દ્વારકા: વરવાળામાં રૂ. 5.50 લાખની ચોરીનો ભેદ ઉકેલાયો

July 16, 2026 10:42 AM

દ્વારકા: વરવાળામાં રૂ. 5.50 લાખની ચોરીનો ભેદ ઉકેલાયો

મામાની દુકાનમાં કામ કરતા ભાણેજે મિત્ર સાથે મળીને આચર્યો ગુનો, બે આરોપી ઝડપાયા

દ્વારકા તાલુકાના વરવાળા ગામમાં આવેલી ગોહેલ એન્જિનિયરિંગ નામની દુકાનમાં થયેલી રૂ. 5.50 લાખથી વધુની રોકડ ચોરીનો ભેદ દ્વારકા પોલીસે ગણતરીના સમયમાં ઉકેલી નાખ્યો છે. આ કેસમાં સામે આવેલી હકીકત મુજબ દુકાનમાં વિશ્વાસપાત્ર તરીકે કામ કરતો ભાણેજ જ પોતાના મિત્ર સાથે મળી ચોરીનો માસ્ટરમાઇન્ડ હોવાનું બહાર આવતા સમગ્ર વિસ્તારમાં આશ્ચર્ય ફેલાયું છે.

મળતી માહિતી અનુસાર વરવાળાની ગોહેલ એન્જિનિયરિંગ દુકાનમાં રાખવામાં આવેલા લોકરમાંથી રૂ. 5.50 લાખથી વધુની રોકડ રકમ ગાયબ થતાં દુકાન માલિકે દ્વારકા પોલીસ મથકે ફરિયાદ નોંધાવી હતી. ફરિયાદ મળ્યા બાદ પોલીસે ઘટનાસ્થળનું નિરીક્ષણ કરી વિવિધ પુરાવાઓ એકત્ર કર્યા હતા તેમજ ટેકનિકલ સર્વેલન્સ અને બાતમીદારોની મદદથી તપાસનો ધમધમાટ શરૂ કર્યો હતો.

તપાસ દરમિયાન પોલીસને શંકાસ્પદ હિલચાલના આધારે ભરતભાઈ પાણખણીયા અને મેરાજ હાજીસાફ નામના બે શખ્સોની સંડોવણી અંગે માહિતી મળી હતી. બંનેને ઝડપી લઈને સઘન પૂછપરછ હાથ ધરતાં તેમણે ચોરીની સમગ્ર યોજના અંગે કબૂલાત કરી હતી. આરોપીઓએ જણાવ્યું હતું કે તેઓ ભાગીદારીમાં કાર ખરીદવાની ઈચ્છા ધરાવતા હતા. પરંતુ પરિવાર તરફથી જરૂરી નાણાં ન મળતાં ટૂંકા સમયમાં રૂપિયા મેળવવાના ઇરાદે આ ગુનાનું કાવતરું ઘડ્યું હતું.

તપાસમાં એ પણ બહાર આવ્યું કે દુકાનમાં કામ કરતો ભાણેજ હોવાથી તેને દુકાનના લોકર, રોકડ રાખવાની વ્યવસ્થા અને દૈનિક કામગીરી અંગે સંપૂર્ણ માહિતી હતી. આ વિશ્વાસનો ગેરલાભ ઉઠાવી તેણે પોતાના સાગરીત સાથે મળીને લોકરમાંથી રોકડ રકમની ચોરી કરી હતી. શરૂઆતમાં ચોરીને સામાન્ય બનાવ તરીકે રજૂ કરવાનો પ્રયાસ કરવામાં આવ્યો હતો, પરંતુ પોલીસની સચોટ તપાસ સામે સમગ્ર ભેદ ખુલ્લો પડી ગયો હતો.

દ્વારકા પોલીસે બંને આરોપીઓની ધરપકડ કરીને તેમની સામે ભારતીય ન્યાય સંહિતાની સંબંધિત કલમો હેઠળ કાયદેસરની કાર્યવાહી હાથ ધરી છે. ચોરીની રકમની વધુ વસૂલાત, અન્ય કોઈ વ્યક્તિની સંડોવણી છે કે કેમ તેમજ ગુનામાં ઉપયોગમાં લેવાયેલા સાધનો અંગે પણ તપાસ આગળ ધપાવવામાં આવી રહી છે.

વિશ્વાસના સંબંધને તોડી મામાની જ દુકાનને નિશાન બનાવવાની આ ઘટના સમગ્ર દ્વારકા પંથકમાં ચર્ચાનો વિષય બની છે. પોલીસે જણાવ્યું છે કે કેસમાં તમામ પાસાઓની ઊંડાણપૂર્વક તપાસ ચાલી રહી છે અને જરૂરી પુરાવાના આધારે આગળની કાર્યવાહી કરવામાં આવશે.

લાઈક અને ફોલો કરો અમારું ફેસબુક પેજ FACEBOOK - AAJKAALDAILY

ફોલો કરો અમારું ઇન્સ્ટાગ્રામ INSTAGRAM - AAJKAALDAILY

સબસ્ક્રાઈબ કરો અમારી યૂ ટ્યૂબ ચેનલ YOUTUBE - AAJKAALDAILY

મહત્વના સમાચારો આપના મોબાઇલમા મેળવવા માટે જોડાઓ અમારા વોટ્સએપ ગ્રૂપમાં 99251 12230

View News On Application

દ્વારકા: વરવાળામાં રૂ. 5.50 લાખની ચોરીનો ભેદ ઉકેલાયો

Recent News

Gujarat's No. 1 evening newspaper