અમરેલી જિલ્લાના ખાંભા તાલુકાના નાની ધારી ગામેથી એક હૃદયકંપાવનારી ઘટના સામે આવી છે. અહીં પ્રેમસંબંધ અને મંગેતરને ભગાડી જવાની જૂની અદાવત રાખીને એક યુવાનની તલવારના આડેધડ ઘા ઝીંકીને નિર્મમ હત્યા કરવામાં આવી છે. નાની ધારી અને ઈગરોળા ગામ વચ્ચેના માર્ગ પર બનેલી આ સનસનાટીભરી વારદાતને પગલે સમગ્ર પંથકમાં ભારે અરેરાટી સાથે ભયનો માહોલ વ્યાપી ગયો છે. ધોળા દિવસે રસ્તા વચ્ચે બનેલી આ ઘટનાથી સ્થાનિક કાયદો અને વ્યવસ્થાની સ્થિતિ સામે પણ સવાલો ઉભા થયા છે.

મળતી વિગતો અનુસાર, નાની ધારી ગામનો રહેવાસી જયરાજ ઉર્ફે લાલુ ઘાખડા નામનો યુવાન જ્યારે નાની ધારી અને ઈગરોળા ગામ વચ્ચેના રોડ પરથી પસાર થઈ રહ્યો હતો, ત્યારે આ લોહિયાળ ઘટના ઘટી હતી. ત્યાં અગાઉથી જ હથિયાર સાથે ઘાત લગાવીને બેઠેલા મયુર વરૂ નામના શખસે જયરાજને રસ્તામાં આંતર્યો હતો. આરોપીએ કંઈ પણ વિચાર્યા વગર પોતાની પાસે રહેલી તલવાર વડે જયરાજ પર તૂટી પડ્યો હતો અને તેના શરીર પર આડેધડ જીવલેણ ઘા ઝીંકી દીધા હતા. હુમલો એટલો ગંભીર અને ઘાતકી હતો કે ગંભીર ઈજાઓના કારણે જયરાજનું ઘટનાસ્થળે જ કમકમાટીભર્યું મોત નીપજ્યું હતું.

પોલીસની પ્રાથમિક તપાસમાં બહાર આવેલી વિગતો મુજબ, આ હત્યા પાછળ પ્રેમપ્રકરણ અને બદલાની ભાવના જવાબદાર હોવાનું સામે આવ્યું છે. મૃતક જયરાજ ઉર્ફે લાલુએ થોડા સમય પહેલા આરોપી મયુર વરૂની મંગેતરને ભગાડી ગયો હતો. આ બાબતને લઈને મયુરના મનમાં તીવ્ર રોષ અને ખાર હતો. પોતાની મંગેતરને ભગાડી જવાનું અપમાન સહન ન થતાં, આરોપી મયુરે જયરાજને પાઠ ભણાવવા અને બદલો લેવાના પાકા ઈરાદા સાથે તેના પર જીવલેણ હુમલો કરી તેનું ઢીમ ઢાળી દીધું હતું.

આ ચકચારી ઘટનાની જાણ થતાં જ ખાંભા પોલીસ મથકનો કાફલો તાત્કાલિક ઘટનાસ્થળે દોડી ગયો હતો. પોલીસે લોહીલુહાણ હાલતમાં પડેલા મૃતક જયરાજના શબને પોતાના કબજામાં લઈ, કાયદેસરની કાર્યવાહી કરીને પોસ્ટમોર્ટમ અર્થે ખાંભા સિવિલ હોસ્પિટલ ખાતે ખસેડ્યો છે. ઘટનાસ્થળે આસપાસના લોકોના ટોળેટોળા એકઠા થઈ ગયા હતા. ખાંભા પોલીસે આ મામલે સત્તાવાર રીતે ગુનો નોંધીને, હત્યા કરીને ફરાર થઈ ગયેલા આરોપી મયુર વરૂને ઝડપી પાડવા માટે જુદી-જુદી દિશામાં ચક્રો ગતિમાન કર્યા છે અને આગળની તપાસ હાથ ધરી છે.