દેવભૂમિ દ્વારકામાં વધતું ડ્રગ્સ નેટવર્ક ચિંતાજનક : પંદર દિવસમાં ત્રીજી વખત ચરસ ઝડપાતા પોલીસની કામગીરી સામે ઉઠ્યા સવાલો

દેવભૂમિ દ્વારકા જિલ્લામાં ફરી એક વખત ચરસનો જથ્થો ઝડપાતા સમગ્ર પંથકમાં ચકચાર મચી જવા પામી છે. અતિ સંવેદનશીલ અને સુરક્ષા દ્રષ્ટિએ મહત્વના ગણાતા વિસ્તારમાં માત્ર પંદર દિવસના ટૂંકા ગાળામાં ત્રીજી વખત નશીલા પદાર્થો ઝડપાતા સ્થાનિક પોલીસની પેટ્રોલિંગ વ્યવસ્થા અને કડક બંદોબસ્તના દાવાઓ સામે અનેક ગંભીર પ્રશ્નો ઉભા થયા છે.

દ્વારકા અને આસપાસના વિસ્તારોમાંથી સતત ચરસનો જથ્થો મળી આવતાં હવે ડ્રગ્સ માફિયાઓના જાળાં કેટલા મજબૂત બન્યા છે તે અંગે ચર્ચાઓ તેજ બની છે. કરોડો રૂપિયાના આ નશીલા કારોબાર પાછળ કોણ છે અને આ નેટવર્કને કોનો આશીર્વાદ મળ્યો છે તે મુદ્દે લોકોમાં ભારે ચર્ચા ચાલી રહી છે.

સ્થાનિક પોલીસ દ્વારા સતત પેટ્રોલિંગ, ચેકિંગ અને સઘન વોચ રાખવાના દાવા કરવામાં આવે છે, પરંતુ વારંવાર ચરસ ઝડપાવાની ઘટનાઓએ આ તમામ દાવાઓની વિશ્વસનીયતા પર સવાલો ઊભા કર્યા છે. જો સુરક્ષા વ્યવસ્થા ખરેખર કડક હોય, તો નશીલા પદાર્થોનો આટલો મોટો જથ્થો વિસ્તારમાં પ્રવેશ કેવી રીતે કરે છે તે સામાન્ય લોકોમાં પણ ચર્ચાનો વિષય બન્યો છે.

દ્વારકા પંથક દરિયાકાંઠા અને આંતરરાષ્ટ્રીય સીમા નજીક આવેલો અતિ મહત્વનો વિસ્તાર માનવામાં આવે છે. આવા વિસ્તારમાં સતત ડ્રગ્સ પકડાવાની ઘટનાઓને કારણે માત્ર સ્થાનિક સ્તરે જ નહીં પરંતુ રાજ્યની સુરક્ષા એજન્સીઓ પણ સતર્ક બની છે.

વારંવાર સામે આવતી આવી ઘટનાઓએ સ્થાનિક પોલીસની કામગીરી, ગુપ્તચર તંત્રની સક્રિયતા અને સમગ્ર સુરક્ષા વ્યવસ્થાની અસરકારકતા અંગે લોકોમાં અનેક સવાલો ઊભા કર્યા છે. હવે લોકોમાં માંગ ઉઠી રહી છે કે ડ્રગ્સ નેટવર્ક સામે કડક અને વ્યાપક કાર્યવાહી કરી સમગ્ર રેકેટનો પર્દાફાશ કરવામાં આવે.
​​​​​​​