લાલપુરના સરકારી ક્વાર્ટર્સમાં તંત્રની આંખ નીચે અજાણ્યા શખ્સો દ્વારા વૃક્ષોનું નિકંદન

May 30, 2026 12:40 PM

વડલો અને પીપળા જેવા વર્ષો જૂના વૃક્ષો પર કુહાડી ફેરવાતા પર્યાવરણપ્રેમીઓમાં રોષ: પક્ષીઓના આશ્રયસ્થાન છીનવાયા

લાલપુર તાલુકા શાળા નજીક આવેલ તાલુકા પંચાયતના સરકારી ક્વાર્ટર્સની જગ્યામાં તંત્રની ઘોર બેદરકારી અને મિલીભગતની શંકા વચ્ચે એક શરમજનક ઘટના સામે આવી છે. અહીં કોઈ અજાણ્યા આવારા તત્વો દ્વારા વહીવટી તંત્રની કોઈ પણ પ્રકારની પૂર્વ મંજૂરી વિના જ વર્ષો જૂના અને વિશાળ કદના વૃક્ષોને આડેધડ કાપી નાખવામાં આવ્યા હોવાનું પ્રકાશમાં આવ્યું છે. આ ગેરકાયદેસર પ્રવૃત્તિને પગલે સ્થાનિક રહીશો અને પર્યાવરણપ્રેમીઓમાં ભારે આક્રોશ ફાટી નીકળ્યો છે.

સ્થાનિક સૂત્રો પાસેથી મળતી માહિતી મુજબ, છેલ્લા બે દિવસથી મોડી રાત્રિના અંધકારનો લાભ લઈને કેટલાક અસામાજિક અને સ્વાર્થી તત્વો દ્વારા આ હરિયાળા વૃક્ષોનું છેદન કરવામાં આવી રહ્યું છે. હાલ આ સરકારી ક્વાર્ટરો તદ્દન જર્જરીત અને જોખમી હાલતમાં હોવાથી ત્યાં કોઈ વસવાટ કરતું નથી. ક્વાર્ટર્સ સુમસામ હોવાનો સીધો ફાયદો ઉઠાવીને આ અજાણ્યા શખ્સો મોડી રાત્રે સરકારી મિલકતમાં ઘૂસીને પર્યાવરણનું નિકંદન કાઢી રહ્યા છે. એટલું જ નહીં, આસપાસના લોકોમાં એવી પણ ચર્ચા ચાલી રહી છે કે જો તંત્ર દ્વારા તાત્કાલિક પગલાં લેવામાં નહીં આવે તો આગામી દિવસોમાં પણ બાકી બચેલા વૃક્ષોને કાપવાની આ ગેરકાયદેસર કામગીરી ચાલુ રાખવામાં આવશે.

આ આડેધડ વૃક્ષછેદનને કારણે પર્યાવરણને ક્યારેય ન પુરાય તેવું મોટું નુકસાન પહોંચ્યું છે. પ્રકૃતિના ફેફસાં સમાન અને માનવજાતને અમૂલ્ય ઓક્સિજન પૂરો પાડતા વર્ષો જૂના વડલા અને પીપળા જેવા પવિત્ર અને ઘટાદાર વૃક્ષોને જમીનદોસ્ત કરી દેવાયા છે. આ વૃક્ષો માત્ર પર્યાવરણની શોભા નહોતા, પરંતુ હજારો નિર્દોષ પક્ષીઓનું આશ્રયસ્થાન હતા. રાતોરાત વૃક્ષો કપાઈ જતાં અસંખ્ય પક્ષીઓના માળાઓ વેરવિખેર થઈ ગયા છે અને તેઓ આશ્રયવિહોણા બનીને ભટકવા મજબૂર બન્યા છે.

સરકારી મિલકત પર આ પ્રકારે કાયદાના લીરેલીરા ઉડાડતી પ્રવૃત્તિ થઈ રહી હોવા છતાં સ્થાનિક તંત્ર હજુ સુધી કુંભકર્ણની નિદ્રામાં હોય તેમ જણાઈ રહ્યું છે. આ ગંભીર મામલે સ્થાનિક રહીશો દ્વારા ઉચ્ચ કક્ષાએ યોગ્ય અને તટસ્થ તપાસ કરવાની ઉગ્ર માંગ ઉઠાવવામાં આવી છે. સરકારી મિલકતને નુકસાન પહોંચાડતા અને પર્યાવરણનું ખૂન કરતા આવા લુખ્ખા તત્વોને વહેલી તકે શોધી કાઢી, તેમની સામે કડક કાયદાકીય કાર્યવાહી કરવામાં આવે અને આ ગેરકાયદે કામગીરી તાત્કાલિક અટકાવવામાં આવે તેવી તંત્રને માંગ કરવામાં આવી છે.

લાઈક અને ફોલો કરો અમારું ફેસબુક પેજ FACEBOOK - AAJKAALDAILY

ફોલો કરો અમારું ઇન્સ્ટાગ્રામ INSTAGRAM - AAJKAALDAILY

સબસ્ક્રાઈબ કરો અમારી યૂ ટ્યૂબ ચેનલ YOUTUBE - AAJKAALDAILY

મહત્વના સમાચારો આપના મોબાઇલમા મેળવવા માટે જોડાઓ અમારા વોટ્સએપ ગ્રૂપમાં 99251 12230

View News On Application

લાલપુરના સરકારી ક્વાર્ટર્સમાં તંત્રની આંખ નીચે અજાણ્યા શખ્સો દ્વારા વૃક્ષોનું નિકંદન

Recent News

Gujarat's No. 1 evening newspaper