કૃપા ફાઉન્ડેશનમાં જીવદયા તથા ગૌસેવાને લગતી સેવાકીય પ્રવૃત્તિ કરનાર ભાવિનભાઈ ઘનશ્યામભાઈ ધીયાડ (રહે. મોરબી રોડ, રાજકોટ) દ્વારા આટકોટ પોલીસ સ્ટેશનમાં નોંધાવવામાં આવેલી ફરિયાદમાં આરોપી તરીકે ભવાનભાઈ હરિભાઈ ભુવા (ઉ.વ. 23 રહે. બરવાળા જિ. બોટાદ) નું નામ આપ્યું છે.

ફરિયાદમાં જણાવ્યું હતું કે, તા. 12/11 ના રાત્રિના 10:30 વાગ્યા આસપાસ એવી માહિતી મળી હતી કે, ગોંડલ પાસેના રામોદ ગામેથી જસદણ તરફ એક સફેદ કલરની મહિન્દ્રા બોલેરો પીકઅપ નંબર જીજે 33 ટી 4104 વાહનમાં બળદ ભરી મહારાષ્ટ્રના ધુલિયા ખાતે કતલખાને લઈ જવાના છે. જેથી ગૌરક્ષકની ટીમ દ્વારા ગોંડલ ચોકડી પાસે વોચ ગોઠવી હતી અને પોલીસને પણ આ બાબતે જાણ કરી હતી. દરમિયાન આટકોટ પાસે ગોંડલ ચોકડી નજીક બોલેરો નીકળતા તેને અટકાવી હતી. ચાલકનું નામ પૂછતા તેનું નામ ભગવાન હરિભાઈ ભુવા (ઉ.વ. 23) હોવાનું જણાવ્યું હતું. બોલરોમાં જોતા અંદર ખીચોખીચ ટૂંકા દોરડાથી મોઢું બાંધી તથા પગ બાંધી ઘાસચારો વ્યવસ્થા કર્યા વગર બે બળદને બાંધ્યા હોય જેને કતલખાને લઈ જવાના ઇરાદે વાહનમાં લઈ જવામાં આવતા હોય જેથી આ અંગે જીવ દયાપ્રેમી દ્વારા આટકોટ પોલીસ સ્ટેશનમાં ફરિયાદ નોંધાવવામાં આવી હતી. પોલીસે બોલેરો પીકઅપ વાહન કિંમત રૂ.4 લાખ અને બે પશુ કિં.રૂ. ૧૫ હજારના મુદ્દામાલ સાથે આ શખસોને ઝડપી લઇ તેના વિરુદ્ધ પશુ સંરક્ષણ અધિનીયમની કલમ હેઠળ ગુનો નોંધી કાયદેસરની કાર્યવાહી કરી હતી.