ગુજરાતના વિવિધ વર્તમાનપત્રો અને ઈલેક્ટ્રોનિક મીડિયામાં વહેતા થયેલા સમાચાર કે "સરકાર હવે શિક્ષકો પાસે રખડતાં કૂતરાં ગણાવશે", તેને ગાંધીનગર સ્થિત શાળાઓની કચેરીએ સંપૂર્ણપણે પાયાવિહોણા અને સત્યથી વેગળા ગણાવ્યા છે. સંયુક્ત શિક્ષણ નિયામક દ્વારા બહાર પાડવામાં આવેલા એક પત્રમાં સ્પષ્ટતા કરવામાં આવી છે કે શિક્ષકોને આવી કોઈ પણ કામગીરી સોંપવામાં આવી નથી.

શું છે સમગ્ર મામલો?
હકીકતમાં, આ આખી પ્રક્રિયા નામદાર સુપ્રીમ કોર્ટના એક આદેશને આભારી છે. સુપ્રીમ કોર્ટે 'ડોગ બાઈટ' (કૂતરાં કરડવા) ના વધતા કિસ્સાઓને ગંભીરતાથી લઈ શૈક્ષણિક સંસ્થાઓ, હોસ્પિટલો અને જાહેર સ્થળોએ સુરક્ષા વધારવા સૂચના આપી હતી. આ આદેશનો હેતુ વિદ્યાર્થીઓ અને સ્ટાફની સલામતી સુનિશ્ચિત કરવાનો છે, નહીં કે શિક્ષકો પાસે સર્વે કરાવવાનો.

સુપ્રીમ કોર્ટની મુખ્ય દિશાનિર્દેશો
નામદાર કોર્ટના આદેશ મુજબ કેટલીક મહત્વની જવાબદારીઓ નક્કી કરવામાં આવી છે:

કેમ્પસની સુરક્ષા: 
શાળાઓ અને કોલેજોની આસપાસ ફેન્સિંગ, કમ્પાઉન્ડ વોલ અને ગેટ જેવી વ્યવસ્થા કરવી જેથી રખડતાં કૂતરાં અંદર પ્રવેશી ન શકે.

નોડલ ઓફિસરની નિમણૂક: 
દરેક સંસ્થાએ એક નોડલ ઓફિસર નક્કી કરવાનો રહેશે જે કેમ્પસની સ્વચ્છતા અને સુરક્ષાનું ધ્યાન રાખશે.

સર્વેની કામગીરી: 
ગુજરાત પ્રાણી કલ્યાણ બોર્ડ દ્વારા કેમ્પસમાં રહેલા શ્વાનોનો સર્વે કરવા જણાવેલ છે, પરંતુ આ કામગીરી માટે શિક્ષકોનો ઉપયોગ કરવાની કોઈ સૂચના નથી.

​​​​​​​

શિક્ષણ વિભાગની સ્પષ્ટ સ્પષ્ટતા
કમિશનર શાળાઓની કચેરીએ સત્તાવાર રીતે જણાવ્યું છે કે, જિલ્લા શિક્ષણાધિકારીઓને જે આદેશો અપાયા છે તેમાં ક્યાંય પણ એવો ઉલ્લેખ નથી કે માધ્યમિક કે ઉચ્ચતર માધ્યમિક શાળાઓના શિક્ષકો કે કર્મચારીઓએ કૂતરાં ગણવાની કામગીરી કરવાની રહેશે. આ સૂચનાઓ માત્ર જાહેરહિતમાં અને વિદ્યાર્થીઓની સુરક્ષાના ભાગરૂપે આપવામાં આવી હતી, જેને મીડિયામાં ખોટી રીતે રજૂ કરવામાં આવી છે.