મોટાભાગના સામાન્ય ક્રેડિટ કાર્ડ્સ પેટ્રોલ પંપ પર ઈંધણ ભરાવવા બદલ કોઈ રિવોર્ડ પોઈન્ટ્સ આપતા નથી, પરંતુ 'કો-બ્રાન્ડેડ ફ્યુઅલ ક્રેડિટ કાર્ડ્સ' આ મામલે ગેમ ચેન્જર સાબિત થઈ રહ્યા છે. આ કાર્ડ્સ દ્વારા તમે વર્ષે હજારો રૂપિયાની બચત કરી શકો છો.

શું છે આ કાર્ડની વિશેષતા?
ફ્યુઅલ ક્રેડિટ કાર્ડ્સ મુખ્યત્વે બે રીતે ફાયદો પહોંચાડે છે. જ્યારે તમે આ કાર્ડથી પેટ્રોલ પંપ પર પેમેન્ટ કરો છો, ત્યારે તમને પોઈન્ટ્સ મળે છે. આ પોઈન્ટ્સને તમે પછીથી મફત પેટ્રોલ મેળવવા માટે અથવા ગિફ્ટ વાઉચર્સમાં રૂપાંતરિત કરી શકો છો. સામાન્ય રીતે ક્રેડિટ કાર્ડથી પેટ્રોલ ભરાવવા પર 1% સરચાર્જ લાગે છે. ફ્યુઅલ કાર્ડ્સ આ વધારાનો ચાર્જ માફ કરી દે છે, જે સીધી બચત છે.

ઓઈલ કંપનીઓ સાથેનું જોડાણ
સૌથી વધુ ફાયદો મેળવવા માટે તમારે એ જોવું જોઈએ કે કાર્ડ કઈ ઓઈલ કંપની સાથે જોડાયેલું છે. ભારતની અગ્રણી કંપનીઓ જેવી કે ઈન્ડિયન ઓઈલ (IOCL), ભારત પેટ્રોલિયમ (BPCL) અને હિન્દુસ્તાન પેટ્રોલિયમ (HPCL) બેંકો સાથે મળીને આવા કાર્ડ્સ જારી કરે છે. જો તમારી પાસે BPCL સાથે જોડાયેલું કાર્ડ હોય, તો તે જ કંપનીના પંપ પર ઈંધણ ભરાવવા પર તમને મહત્તમ રિવોર્ડ પોઈન્ટ્સ મળશે.

નવું કાર્ડ લેતા પહેલા આ બાબતો તપાસો
નિષ્ણાતોના મતે ફ્યુઅલ ક્રેડિટ કાર્ડ પસંદ કરતી વખતે માત્ર જાહેરાતો પર ભરોસો ન કરવો જોઈએ.

વાર્ષિક ફી: શું કાર્ડની ફી તેની સામે મળતી બચત કરતા વધુ છે?

રિવોર્ડ વેલ્યુ: એક રિવોર્ડ પોઈન્ટની કિંમત કેટલા પૈસા થાય છે તે જાણવું જરૂરી છે.

​​​​​​​માસિક લિમિટ: સરચાર્જ માફીની એક લિમિટ હોય છે, જે તમારા વપરાશ મુજબ હોવી જોઈએ.

એક્સપાયરી ડેટ: રિવોર્ડ પોઈન્ટ્સ ચોક્કસ સમય બાદ રદ થઈ જાય છે, તેથી તેને સમયસર વપરાશમાં લેવા જોઈએ.

આજના સમયમાં ઘણા ફ્યુઅલ કાર્ડ્સ માત્ર પેટ્રોલ પંપ પૂરતા મર્યાદિત નથી. તેઓ ગ્રોસરી, વીજળી બિલ કે ઓનલાઈન શોપિંગ પર પણ વધારાના ડિસ્કાઉન્ટ આપે છે. આથી, જો તમે સ્માર્ટ રીતે આ કાર્ડનો ઉપયોગ કરો, તો પેટ્રોલનું બિલ નોંધપાત્ર રીતે ઘટાડી શકાય છે.