કેટલાક લોકોએ ડીજે સંગીતની સાથે રંગોત્સવની મજા માણી હતી તો કેટલાક લોકોએ પરંપરાગત ઢોલના તાલે નૃત્ય કરીને તહેવારને યાદગાર બનાવ્યો હતો. બાળકો માટે પણ આ દિવસ ખાસ રહ્યો હતો. નાના બાળકો પાણીની પિચકારી અને રંગીન બલૂન સાથે રમતા જોવા મળ્યા હતા. ધૂળેટીની ઉજવણી દરમિયાન કોઈપણ અનિચ્છનીય ઘટના ન બને તે માટે પોલીસ તંત્ર દ્વારા કડક સુરક્ષા વ્યવસ્થા ગોઠવવામાં આવી હતી. શહેરના મહત્વના સ્થળોએ પોલીસનો કડક બંદોબસ્ત રાખવામાં આવ્યો હતો. રેસકોર્સ મેદાન સહિત ભીડવાળા વિસ્તારોમાં પોલીસ પેટ્રોલિંગ કરવામાં આવી રહ્યું હતું. કાયદો અને વ્યવસ્થાની ચુસ્ત ગોઠવણને કારણે ઉજવણી શાંતિપૂર્ણ માહોલમાં પૂર્ણ થઈ હતી.

આ સાથે શહેરના અનેક વિસ્તારોમાં પણ લોકો દ્વારા ધૂળેટીની ઉજવણી કરવામાં આવી હતી. રહેણાંક વિસ્તારોમાં લોકો પોતાના પડોશીઓ અને મિત્રો સાથે રંગોની મજા માણતા જોવા મળ્યા હતા. અબીલ-ગુલાલ અને સંગીતના સથવારે સમગ્ર શહેર રંગમય બની ગયું હતું. શહેરીજનોએ ઉત્સાહપૂર્વક રંગોના આ પર્વની ઉજવણી કરીને ભાઈચારો અને એકતાનો સંદેશ આપ્યો હતો.