ક્રિકેટ ચાહકોને વધુ ઉત્સાહિત કરવા માટે એક નવું ફોર્મેટ તૈયાર છે. વિશ્વની સૌથી લોકપ્રિય રમતોમાંની એક હવે એક રોમાંચક વળાંક લેવા જઈ રહી છે. એક નવું હાઇબ્રિડ ફોર્મેટ, "ટેસ્ટ ટ્વેન્ટી" લોન્ચ કરવામાં આવ્યું છે, જે ટેસ્ટ ક્રિકેટની ટેકનિક અને ધીરજને T20 ક્રિકેટના ઉત્સાહ સાથે જોડે છે. આ ક્રિકેટનું ચોથું સત્તાવાર ફોર્મેટ બની શકે છે. જોકે, ICCએ હજુ સુધી આ અંગે કોઈ ટિપ્પણી કરી નથી. હાલમાં, ICC દ્વારા ફક્ત ટેસ્ટ, ODI અને T20 ફોર્મેટને જ માન્યતા આપવામાં આવી છે.

એબી ડી વિલિયર્સ, હરભજનસિંઘ, મેથ્યુ હેડન અને ક્લાઈવ લોઇડ જેવા દિગ્ગજો શુક્રવાર, 16 ઓક્ટોબરના રોજ વર્ચ્યુઅલ લોન્ચમાં હાજર રહ્યા હતા અને ફોર્મેટની પ્રશંસા કરી હતી. ટેસ્ટ T20ની પ્રથમ સીઝન જાન્યુઆરી 2026માં શરૂ થશે. આ ફોર્મેટ મુખ્યત્વે 13 થી 19 વર્ષની વયના યુવા ક્રિકેટરોના વિકાસ પર ધ્યાન કેન્દ્રિત કરશે.​​​​​​​

ટેસ્ટ ટ્વેન્ટી શું છે?

ટેસ્ટ ટ્વેન્ટી એક દિવસીય મેચ છે. સરળ શબ્દોમાં કહીએ તો, તેને બે T20 મેચ પણ કહી શકાય. જો કે, ઘણા નિયમો ટેસ્ટ ક્રિકેટ જેવા જ છે. ઉદાહરણ તરીકે, એક ઇનિંગ 20 ઓવરની હશે, અને ટેસ્ટ ક્રિકેટની જેમ, એક ટીમે બે વાર બેટિંગ કરવી પડશે. બોલરોએ 20 વિકેટ લેવી પડશે. જો બોલરો 20 વિકેટ લેવામાં નિષ્ફળ જાય, તો મેચ ડ્રો થશે નહીં, પરંતુ સૌથી ઓછો સ્કોર ધરાવતી ટીમ હારી જશે.

ફોર્મેટને સરળ શબ્દોમાં સમજો

એક મેચ ૮૦ ઓવરની હશે, જેમાં ચાર ઇનિંગ્સ હશે. દરેક ટીમ બે વાર બેટિંગ કરશે. દરેક ઇનિંગ્સમાં ૨૦ ઓવર હશે, અને જો કોઈ ટીમ ૨૦ ઓવર પહેલાં ઓલઆઉટ થઈ જાય, તો બીજી ટીમ બેટિંગ કરવા આવશે. આ ફોર્મેટના સૌથી મહત્વપૂર્ણ નિયમો પાવરપ્લે અને ફોલો-ઓન છે. પાવરપ્લે ચાર ઓવર સુધી ચાલશે, અને બીજી ટીમ ફક્ત ત્યારે જ ફોલો-ઓન કરશે જો તેઓ પ્રથમ ઇનિંગ્સમાં ૭૫ થી વધુ રન પાછળ હોય. એક બોલર પ્રતિ મેચ વધુમાં વધુ આઠ ઓવર ફેંકી શકે છે. ખેલાડીઓએ સફેદ જર્સી પહેરવાની રહેશે અને મેચ લાલ બોલથી રમવામાં આવશે.