અમેરિકી પ્રમુખની વધુ એક ખુલ્લી ધમકી, બીજી તરફ ભારત પોતાના નિર્ણયો પર અડગ: મોદીએ તેન નહીં ખરીદવાની ખાતરી આપી હોવાનો દાવો દોહરાવ્યો

અમેરિકન રાષ્ટ્રપતિ ડોનાલ્ડ ટ્રમ્પે ફરી એકવાર ભારત પર કડક વલણ અપનાવતા કહ્યું છે કે જો ભારત રશિયા પાસેથી ક્રૂડ ઓઇલ આયાત કરવાનું ચાલુ રાખશે, તો તેને ભારે આયાત ટેરિફ ચૂકવવા પડશે. ટ્રમ્પે એરફોર્સ વનમાં પત્રકારો સાથે વાત કરતી વખતે કહ્યું, "મેં વડા પ્રધાન મોદી સાથે વાત કરી. તેમણે કહ્યું કે ભારત રશિયન તેલ ખરીદશે નહીં. જો તેઓ આમ નહીં કરે, તો તેમને ભારે ટેરિફ ચૂકવવા પડશે.ટ્રમ્પ વહીવટીતંત્ર માને છે કે જે દેશો રશિયા પાસેથી તેલ ખરીદે છે તેઓ પરોક્ષ રીતે યુક્રેન યુદ્ધને ભંડોળ પૂરું પાડી રહ્યા છે, તેથી જ અમેરિકા રશિયા પાસેથી ઊર્જા ખરીદતા દેશો પર સતત દબાણ કરી રહ્યું છે. તાજેતરના મહિનાઓમાં, અમેરિકાએ ભારત સહિત અનેક દેશોને રશિયન તેલની આયાત ઘટાડવા અથવા બંધ કરવા વિનંતી કરી છે.

ભારતે ટ્રમ્પના દાવાને ફગાવ્યો

ટ્રમ્પે અગાઉ દાવો કર્યો હતો કે પીએમ મોદીએ તેમને ખાતરી આપી હતી કે ભારત હવે રશિયા પાસેથી તેલ ખરીદશે નહીં. જોકે, ભારતીય વિદેશ મંત્રાલયે ટ્રમ્પના દાવાને ફગાવી દીધો છે. વિદેશ મંત્રાલયના પ્રવક્તા રણધીર જયસ્વાલે જણાવ્યું હતું કે ભારતની ઊર્જા નીતિનો હેતુ તેના ગ્રાહકોના હિતોનું રક્ષણ કરવાનો છે. તેમણે ઉમેર્યું હતું કે ભારત એક જવાબદાર ઊર્જા આયાતકાર છે. "અમે કિંમતો સ્થિર રાખવા અને પુરવઠાની વિવિધતા જાળવવા માટે સ્વતંત્ર રીતે અમારા નિર્ણયો લઈએ છીએ. ભારતે પુનરોચ્ચાર કર્યો કે તેની પ્રાથમિકતા આર્થિક સંતુલન અને સ્થાનિક જરૂરિયાતોને પૂર્ણ કરવાની છે, રાજકીય દબાણને વશ ન થવું.

ટ્રમ્પના ટેરિફનો ભારત પર પ્રભાવ

આ વર્ષની શરૂઆતમાં, ટ્રમ્પ વહીવટીતંત્રે કપડાં, ફાર્માસ્યુટિકલ્સ અને કૃષિ ઉત્પાદનો સહિત અનેક ભારતીય ઉત્પાદનો પર આયાત જકાતમાં વધારો કર્યો હતો. ભારતીય ઉદ્યોગ સંગઠનોનું કહેવું છે કે આ નીતિએ નિકાસ પર નકારાત્મક અસર કરી છે. જો રશિયન તેલ પર નવા ટેરિફ લાદવામાં આવે છે, તો ભારત-અમેરિકાના વેપાર સંબંધોમાં ખટાશ આવી શકે છે.ટ્રમ્પે દાવો કર્યો હતો કે વડા પ્રધાન નરેન્દ્ર મોદીએ તેમને રશિયન તેલ નહીં ખરીદવાનું વચન આપ્યું હતું. જોકે ભારત સરકારે સ્પષ્ટ કર્યું હતું કે આવી વાતચીતનો કોઈ સત્તાવાર રેકોર્ડ નથી.

ભારતની ઊર્જા વ્યૂહરચના

ભારત વિશ્વનો ત્રીજો સૌથી મોટો તેલ આયાતકાર દેશ છે. નવી દિલ્હી કહે છે કે તેનું લક્ષ્ય સસ્તું, ટકાઉ અને વૈવિધ્યસભર ઊર્જા પુરવઠો જાળવવાનું છે. ભારત હાલમાં સાઉદી અરેબિયા, યુનાઇટેડ સ્ટેટ્સ, રશિયા અને સંયુક્ત આરબ અમીરાત પાસેથી તેલ ખરીદે છે. દરમિયાન, ઊર્જા મંત્રાલયના એક વરિષ્ઠ અધિકારીએ જણાવ્યું હતું કે રશિયન તેલ સૌથી આર્થિક રીતે ખર્ચ-અસરકારક સ્ત્રોત સાબિત થઈ રહ્યું છે, અને તેથી, ભારત તેને તેની ઊર્જા સુરક્ષા વ્યૂહરચનાનો ભાગ માને છે.