મધ્ય પૂર્વમાં ચાલી રહેલા સંઘર્ષ વચ્ચે રવિવારે દક્ષિણ લેબનોનમાં તણાવ ચરમસીમાએ પહોંચ્યો છે. લેબનોનની રાષ્ટ્રીય સમાચાર એજન્સીના અહેવાલ મુજબ ઇઝરાયેલી હુમલાઓ બાદ નબાતિહ ગવર્નરેટ (Nabatieh governorate) ના અનેક ગામડાઓમાંથી કાળા ધુમાડાના ગોટેગોટા આકાશમાં જોવા મળ્યા છે. ઇઝરાયેલી સેનાએ હિઝબુલ્લાહ (Hezbollah) સામેની કાર્યવાહીના ભાગરૂપે ૧૧ નગરો અને ગામડાઓના રહેવાસીઓને તાત્કાલિક વિસ્તાર છોડીને સુરક્ષિત સ્થળે ખસી જવાની ચેતવણી આપી છે.

હુમલા અને ચેતવણી
ઇઝરાયેલી લશ્કરે દક્ષિણ લેબનોનના ૧૧ ગામોના લોકોને તેમના ઘરો ખાલી કરીને ઓછામાં ઓછા ૧,૦૦૦ મીટર (૩,૩૦૦ ફૂટ) દૂર ખુલ્લા વિસ્તારોમાં જવાની તાકીદ કરી છે. ઇઝરાયેલના જણાવ્યા અનુસાર આ કાર્યવાહી યુદ્ધવિરામ કરારના ઉલ્લંઘન બાદ હિઝબુલ્લાહના ઠેકાણાઓને નિશાન બનાવવા માટે કરવામાં આવી રહી છે.


ઇઝરાયેલી સૈનિકો દક્ષિણ લેબનોનના સરહદી વિસ્તારમાં હાજર છે અને હિઝબુલ્લાહ દ્વારા ઉપયોગમાં લેવાતી માળખાકીય સુવિધાઓ તેમજ મકાનોને નષ્ટ કરી રહ્યા છે. ઈરાન સમર્થિત હિઝબુલ્લાહ જૂથે પણ ઇઝરાયેલી સૈનિકો અને ઉત્તરી ઇઝરાયેલ પર ડ્રોન અને રોકેટ હુમલાઓ ચાલુ રાખ્યા છે.