ઈરાન અને ઈઝરાયેલ વચ્ચે ચાલી રહેલા જંગમાં હવે અમેરિકા સીધું નિશાના પર આવ્યું છે. ઈરાની સૈન્યએ સત્તાવાર નિવેદન જારી કરીને દાવો કર્યો છે કે દરિયાકાંઠેથી છોડવામાં આવેલી તેમની અત્યાધુનિક ક્રૂઝ મિસાઈલોએ અમેરિકન યુદ્ધજહાજ USS અબ્રાહમ લિંકનને સફળતાપૂર્વક નિશાન બનાવ્યું છે. ઈરાની નેવીના કમાન્ડરે ખુલ્લી ચેતવણી આપી છે કે જો આ યુદ્ધજહાજ તેમની મિસાઈલ રેન્જમાં આવશે તો તેને ફરીથી ટાર્ગેટ કરવામાં આવશે.

અમેરિકાનું મૌન અને ઈરાનની બાજ નજર
નોંધપાત્ર બાબત એ છે કે ઈરાનના આ ખતરનાક દાવા પર અમેરિકાએ હજુ સુધી કોઈ સ્પષ્ટ પ્રતિક્રિયા આપી નથી. વોશિંગ્ટન દ્વારા આ હુમલાને ન તો સ્વીકારવામાં આવ્યો છે, ન તો નકારવામાં આવ્યો છે. બીજી તરફ, ઈરાને સ્પષ્ટ કર્યું છે કે તેઓ USS અબ્રાહમ લિંકનની દરેક હિલચાલ પર સતત નજર રાખી રહ્યા છે. નિષ્ણાતો માને છે કે જો આ દાવો સાચો સાબિત થશે, તો અમેરિકા અને ઈરાન વચ્ચે સીધું યુદ્ધ ફાટી નીકળી શકે છે.

છેલ્લા 24 કલાકમાં ઈરાને ઈઝરાયેલ પર પણ આક્રમકતા વધારી દીધી છે. ઈરાને એકસાથે 220 મિસાઈલો દાગી છે, જે આ યુદ્ધમાં ઈરાન તરફથી કરવામાં આવેલો અત્યાર સુધીનો સૌથી મોટો મિસાઈલ હુમલો છે. ઈરાનનો સંદેશ સાફ છે કે ઈઝરાયેલનો હવે એક પણ ખૂણો સુરક્ષિત બચશે નહીં.

તેલ અવીવ અને હાઈફામાં ભારે તબાહી
ઈરાની મિસાઈલોએ ઈઝરાયેલના મુખ્ય શહેરોમાં ભારે નુકસાન પહોંચાડ્યું છે. તેલ અવીવ, હાઈફા, બની બ્રાક અને પેટાહ ટિકવા જેવા ગીચ વસ્તીવાળા વિસ્તારોમાં મિસાઈલો ત્રાટકી છે. અનેક રહેણાંક ઈમારતો ધરાશાયી થવાના અહેવાલો છે અને મોટી સંખ્યામાં લોકો ઘાયલ થયા છે. જોકે, સત્તાવાર આંકડાઓ હજુ જાહેર થવાના બાકી છે.

નવી પેઢીની મિસાઈલોનો ઉપયોગ
ઈરાને આ હુમલામાં પોતાની 'નવી જનરેશન'ની અત્યાધુનિક બેલેસ્ટિક મિસાઈલોનો ઉપયોગ કર્યો હોવાનો દાવો કર્યો છે. જેમાં મુખ્યત્વે નીચેની મિસાઈલો સામેલ છે:

ફતહ-2 (Fattah-2)

સેજિલ (Sejjil)

ઈમાદ (Emad)

ખોર્રમશહર-4 (Khorramshahr-4)
​​​​​​​

આ મિસાઈલો પોતાની ચોકસાઈ અને ભારે વિસ્ફોટકો વહન કરવાની ક્ષમતા માટે જાણીતી છે. અમેરિકા તરફથી વાતચીતની દરખાસ્ત હોવા છતાં ઈરાન અત્યારે માત્ર સૈન્ય કાર્યવાહી દ્વારા જ જવાબ આપવાના મૂડમાં હોય તેવું જણાઈ રહ્યું છે.