ગુજરાત રાજ્યના મહેસૂલ વિભાગમાં ઓનલાઇન કામગીરી અને ઈ-ગવર્નન્સનું પ્રમાણ સતત વધી રહ્યું છે. આ પ્રક્રિયાને વધુ સચોટ અને ઝડપી બનાવવા માટે રાજ્ય સરકારે દરેક જિલ્લાની કલેક્ટર કચેરીમાં 'આઈટી કન્સલ્ટન્ટ' નિમણૂક કરવાનો મહત્વનો નિર્ણય લીધો છે.

મહેસૂલ વિભાગ દ્વારા રાજ્યના તમામ ૩૪ જિલ્લાઓમાં આઉટસોર્સિંગના ધોરણે આ નિમણૂકો કરવામાં આવશે. આ માટે સરકારે રૂ. ૧.૮૭ કરોડની જોગવાઈ કરી છે અને પસંદગી પામનાર આઈટી કન્સલ્ટન્ટને માસિક રૂ. ૫૦,૦૦૦નો પગાર આપવામાં આવશે.

આ આઈટી કન્સલ્ટન્ટ્સ કલેક્ટર કચેરી માટે ઓનલાઇન ડેટા એનાલિસિસ, પ્રેઝન્ટેશન ફાઈલ તૈયાર કરવી અને વેબ પોર્ટલની જાળવણી જેવી કામગીરી સંભાળશે. આ ઉપરાંત, તેઓ સ્વાગત , સીએમઓ પોર્ટલ, પીજી પોર્ટલ અને સીએમ ડેશબોર્ડ જેવા મહત્વના સરકારી પોર્ટલનું સતત મોનિટરિંગ અને સંકલન કરશે, જેથી દૈનિક રિપોર્ટ અને સ્ટેટસ જનરેટ કરી ડેટા મેનેજમેન્ટને વધુ સુદ્રઢ બનાવી શકાય.