આઈસીસી (ICC) ટી-20 વર્લ્ડ કપના સુપર-8 તબક્કાનો રોમાંચ હવે ચરમસીમાએ પહોંચ્યો છે. આજે અમદાવાદના વિશ્વવિખ્યાત નરેન્દ્ર મોદી સ્ટેડિયમ ખાતે ભારત અને સાઉથ આફ્રિકા વચ્ચે ત્રીજી મહત્વની મેચ રમાવા જઈ રહી છે. સાંજે 7 વાગ્યે શરૂ થનારા આ મુકાબલાને લઈને સમગ્ર શહેરમાં જાણે દિવાળી જેવો માહોલ જોવા મળી રહ્યો છે.

સ્ટેડિયમ બહાર ‘ઈન્ડિયા-ઈન્ડિયા’ના નાદ

મેચ શરૂ થવાને હજુ કલાકોની વાર છે, ત્યાં જ વહેલી સવારથી ક્રિકેટ પ્રેમીઓનો સ્ટેડિયમ આસપાસ જમાવડો જોવા મળ્યો હતો. મેટ્રો ટ્રેન દ્વારા હજારોની સંખ્યામાં ચાહકો મોટેરા પહોંચી રહ્યા છે. સ્ટેડિયમ તરફ જતા માર્ગો પર ભારતીય તિરંગા લહેરાતા જોવા મળ્યા હતા. ચાહકો ભારતીય ટીમની જર્સી પહેરીને અને ચહેરા પર તિરંગો પેઈન્ટ કરાવીને ‘ઈન્ડિયા ઈન્ડિયા’ના જોરદાર નારા લગાવી રહ્યા છે, જેનાથી વાતાવરણ ગુંજી ઉઠ્યું છે.

દિગ્ગજ કોમેન્ટેટર્સનું અમદાવાદમાં આગમન

આ મેચનું ખાસ આકર્ષણ માત્ર મેદાન પરના ખેલાડીઓ જ નહીં, પણ કોમેન્ટ્રી બોક્સમાં બેસનારા દિગ્ગજો પણ છે. સુનીલ ગાવસ્કર, રવિ શાસ્ત્રી અને હાલમાં જ નિવૃત્ત થયેલા દિનેશ કાર્તિકની ત્રિપુટી અમદાવાદ પહોંચી ગઈ છે. આ દિગ્ગજ ખેલાડીઓની કોમેન્ટ્રી સાંભળવા માટે પણ ચાહકોમાં અનેરો ઉત્સાહ છે. રવિ શાસ્ત્રીનો બુલંદ અવાજ અને ગાવસ્કર-કાર્તિકનું વિશ્લેષણ મેચના રોમાંચને બમણો કરશે.

શહેરમાં મેચનો ક્રેઝ: કેફેમાં વિશેષ આયોજન

માત્ર સ્ટેડિયમ જ નહીં, પરંતુ સમગ્ર અમદાવાદમાં મેચનો માહોલ જામ્યો છે. સી.જી. રોડ અને એસ.જી. હાઈવે પર આવેલા અનેક જાણીતા કેફે અને રેસ્ટોરન્ટ્સમાં વિશાળ સ્ક્રીન પર લાઈવ ટેલિકાસ્ટની વ્યવસ્થા કરવામાં આવી છે. જે ચાહકોને ટિકિટ નથી મળી, તેઓ મિત્રો સાથે કેફેમાં બેસીને મેચની મજા માણવા માટે થનગની રહ્યા છે.

ચુસ્ત બંદોબસ્ત અને ટ્રાફિક વ્યવસ્થા

લાખોની ભીડને ધ્યાનમાં રાખીને પોલીસ પ્રશાસન અને સ્ટેડિયમ ઓથોરિટી દ્વારા જડબેસલાક સુરક્ષા વ્યવસ્થા કરવામાં આવી છે.

પાર્કિંગ: સ્ટેડિયમ નજીક અને આસપાસના મેદાનોમાં વિશેષ પાર્કિંગ પ્લોટ્સ ફાળવવામાં આવ્યા છે.

ડાયવર્ઝન: ટ્રાફિકની સમસ્યા ન સર્જાય તે માટે અમુક રસ્તાઓ પર ડાયવર્ઝન આપવામાં આવ્યું છે.

સાઉથ આફ્રિકા સામેની આ જીત ભારતને સેમીફાઈનલની વધુ નજીક લઈ જશે, ત્યારે દરેક ભારતીયની નજર આજે રોહિત શર્માની સેના પર ટકેલી છે.