ગુજરાત પ્રદેશ કોંગ્રેસ સમિતિના અધ્યક્ષ અમિત ચાવડા અને પક્ષના નેતા ડૉ. તુષાર ચૌધરીની આગેવાનીમાં આશરે ૧૨ જેટલા ધારાસભ્યોએ અનોખી રીતે વિરોધ પ્રદર્શિત કર્યો હતો. ધારાસભ્યોએ ગેસના ભાવવધારા અને અછતને દર્શાવતા પોસ્ટરો પહેરીને સૂત્રોચ્ચાર કર્યા હતા. કોંગ્રેસે આક્ષેપ કર્યો હતો કે, પશ્ચિમ એશિયાના સંઘર્ષના બહાને સામાન્ય જનતાને હાલાકીમાં મૂકવામાં આવી રહી છે અને સરકાર અછત નિવારવામાં નિષ્ફળ રહી છે.

આ વિરોધ પ્રદર્શન દરમિયાન અફરાતફરીનો માહોલ સર્જાયો હતો. કોંગ્રેસના ધારાસભ્ય અમૃતજી ઠાકોરને પોલીસ કર્મીઓ દ્વારા રોકવાનો પ્રયાસ કરાતા તેઓ પગથિયાં પર પડી ગયા હતા. આ ઘટના બાદ ધારાસભ્ય અને પોલીસ વચ્ચે ઉગ્ર શાબ્દિક સંઘર્ષ જોવા મળ્યો હતો, જેને પગલે વાતાવરણ તંગ બની ગયું હતું . સ્થિતિ ગંભીર હોવાનો વિપક્ષનો દાવો કરવામાં આવ્યો હતો.

દેશમાં આયાતમાં વિક્ષેપને કારણે ઘરગથ્થુ અને વાણિજ્યિક સિલિન્ડરના બુકિંગમાં વિલંબ અને લાંબી કતારો સામાન્ય બની છે. જોકે, ત્રણ દિવસ અગાઉ જ કેબિનેટ મંત્રી ઋષિકેશ પટેલે રાજ્યમાં સ્થિતિ નિયંત્રણમાં હોવાનો દાવો કર્યો હતો. તેની સામે વિપક્ષે આકરા તેવર બતાવતા કહ્યું કે, સરકાર વાસ્તવિકતા છુપાવી રહી છે.

"એક તરફ જનતા ગેસ માટે ભટકી રહી છે અને બીજી તરફ સરકાર બધું બરાબર હોવાના દાવા કરે છે. અમે આ મુદ્દો વિધાનસભાના સત્રમાં આક્રમક રીતે ઉઠાવીશું." - અમિત ચાવડા,એ જણાવ્યું હતું.

નોંધનીય છે કે ગતરોજ દિલ્હીમાં પણ આ મુદ્દે સાંસદો દ્વારા વિરોધ કરવામાં આવ્યો હતો, જેની ગુંજ આજે ગુજરાત વિધાનસભામાં સંભળાઈ હતી.