ગુજરાત રાજ્યના મુખ્યમંત્રી ભુપેન્દ્રભાઈ પટેલ આજથી બે દિવસના દિલ્હી પ્રવાસે છે. આ દરમિયાન તેઓ કેન્દ્ર સરકારના ઉચ્ચ નેતૃત્વ સાથે મહત્વપૂર્ણ બેઠકો કરશે. મુખ્યમંત્રી પોતાના દિલ્હી પ્રવાસ દરમિયાન વડાપ્રધાન નરેન્દ્ર મોદી તેમજ ગૃહમંત્રી અમિત શાહ સાથે મુલાકાત કરશે. આ મુલાકાતને રાજ્યના રાજકીય અને વિકાસના દૃષ્ટિકોણથી અત્યંત મહત્વપૂર્ણ માનવામાં આવી રહી છે.

આગામી તારીખ 10 અને 11 જાન્યુઆરીએ વડાપ્રધાન નરેન્દ્ર મોદી ગુજરાતના પ્રવાસે આવી રહ્યા છે. તે પૂર્વે મુખ્યમંત્રી ભુપેન્દ્ર પટેલની દિલ્હી મુલાકાતને ખાસ મહત્વ મળ્યું છે. વડાપ્રધાનના ગુજરાત પ્રવાસ દરમિયાન રાજકોટ ખાતે યોજાનારી વાયબ્રન્ટ ગુજરાત ગ્લોબલ સમિટની પ્રાદેશિક બેઠક મુખ્ય આકર્ષણ બનવાની છે. આ સમિટની તૈયારી, આયોજન અને વ્યવસ્થાઓ અંગે મુખ્યમંત્રી વડાપ્રધાનને વિગતવાર માહિતી આપશે.

રાજ્ય સરકાર દ્વારા વાયબ્રન્ટ ગુજરાત સમિટને સફળ બનાવવા માટે વ્યાપક સ્તરે તૈયારીઓ કરવામાં આવી રહી છે. સુરક્ષા વ્યવસ્થા, મહેમાનોની અવરજવર, ટ્રાફિક વ્યવસ્થા, ઉદ્યોગપતિઓ અને રોકાણકારો માટેની સુવિધાઓ સહિતના મુદ્દાઓ પર કેન્દ્ર સરકાર સાથે સંકલન જરૂરી હોવાથી આ બેઠક મહત્વની માનવામાં આવે છે. મુખ્યમંત્રી પીએમ મોદીને રાજ્ય સરકારની રણનીતિ અને આયોજનથી અવગત કરાવશે.

વડાપ્રધાન નરેન્દ્ર મોદીના રાજકોટ પ્રવાસને લઈને શહેરમાં ખાસ ઉત્સાહ જોવા મળી રહ્યો છે. વડાપ્રધાનના પ્રવાસનું મુખ્ય આકર્ષણ ભવ્ય રોડ-શો રહેશે. રાજકોટના જૂના એરપોર્ટથી મારવાડી યુનિવર્સિટી સુધી વિશાળ રોડ-શોનું આયોજન કરવામાં આવ્યું છે. આ રોડ-શો દરમિયાન લાખોની સંખ્યામાં લોકો ઉમટી પડે તેવી શક્યતા છે. જેને પગલે સમગ્ર રૂટ પર ખાસ સજાવટ કરવામાં આવી રહી છે અને સુરક્ષા વ્યવસ્થાને પણ વધુ મજબૂત બનાવવામાં આવી છે.

રોડ-શો દરમિયાન રૂટ પર ઠેર-ઠેર સાંસ્કૃતિક કાર્યક્રમો યોજાશે. ગુજરાતની લોકસંસ્કૃતિને ઉજાગર કરતા લોકનૃત્ય, સંગીત અને પરંપરાગત વેશભૂષા દ્વારા વડાપ્રધાનનું ભવ્ય સ્વાગત કરવામાં આવશે. શહેરના વેપારી સંગઠનો, સામાજિક સંસ્થાઓ અને યુવાનોમાં આ કાર્યક્રમને લઈને ખાસ ઉત્સાહ જોવા મળી રહ્યો છે.

રોડ-શો બાદ વડાપ્રધાન નરેન્દ્ર મોદી વાયબ્રન્ટ ગુજરાત ગ્લોબલ સમિટના પ્રાદેશિક કાર્યક્રમનું વિધિવત ઉદ્ઘાટન કરશે. આ સમિટમાં દેશ-વિદેશના ઉદ્યોગપતિઓ, કોર્પોરેટ નેતાઓ અને રોકાણકારો હાજરી આપશે. રાજ્ય સરકારનું માનવું છે કે આ સમિટ ગુજરાતના ઔદ્યોગિક વિકાસને નવી દિશા આપશે.

વાયબ્રન્ટ ગુજરાત સમિટ દ્વારા રાજ્યમાં મોટા પાયે રોકાણ આવશે અને નવા ઉદ્યોગો સ્થાપિત થવાથી રોજગારીની નવી તકો ઊભી થશે. ખાસ કરીને યુવાનો માટે રોજગારીના અવસર વધશે તેવી અપેક્ષા છે. મુખ્યમંત્રી ભુપેન્દ્ર પટેલના દિલ્હી પ્રવાસ અને વડાપ્રધાનના ગુજરાત પ્રવાસને લઈને રાજ્યના રાજકીય, ઔદ્યોગિક અને વહીવટી વર્તુળોમાં ચર્ચા તેજ બની છે.