પાકિસ્તાનના બલુચિસ્તાન પ્રાંતમાં સુરક્ષા પરિસ્થિતિ વધુ તંગ બની છે. પ્રતિબંધિત અલગતાવાદી સંગઠન બલુચિસ્તાન લિબરેશન આર્મી (BLA) એ દાવો કર્યો છે કે તેના લડવૈયાઓએ એક ઓપરેશન દરમિયાન પાકિસ્તાની સેનાના સાત જવાનોને બંધક બનાવ્યા છે. સંગઠનનો વધુ દાવો છે કે કેટલાક સૈનિકોએ આત્મસમર્પણ કર્યું હતું. જોકે, આ દાવાઓ અંગે પાકિસ્તાની સત્તાવાળાઓ તરફથી સત્તાવાર પુષ્ટિ કરવામાં આવી નથી.

BLAના પ્રવક્તા દ્વારા જાહેર કરવામાં આવેલા નિવેદન મુજબ, બંધક બનાવાયેલા સૈનિકોને “યુદ્ધ કેદીઓ” ગણવામાં આવ્યા છે. સંગઠને પાકિસ્તાન સરકારને સાત દિવસનું અલ્ટીમેટમ આપ્યું છે. તેમના કહેવા મુજબ જો બલૂચ રાજકીય કેદીઓ, ગુમ થયેલા વ્યક્તિઓ અને અન્ય અટકાયતીઓની મુક્તિ માટે નિર્ધારિત સમયગાળામાં ચોક્કસ પગલાં નહીં લેવાય, તો આ સૈનિકોને तथાકથિત “બલોચ રાષ્ટ્રીય અદાલત” સમક્ષ રજૂ કરવામાં આવશે અને કઠોર સજા કરવામાં આવી શકે છે.

આ સમગ્ર મામલે પાકિસ્તાનના સેનાપતિ અસીમ મુનીર અને પ્રધાનમંત્રી શાહબાઝ શરીફ પર દબાણ વધ્યું હોવાનું આંતરરાષ્ટ્રીય વિશ્લેષકો માની રહ્યા છે. સોશિયલ મીડિયા પર કેટલાક ફોટા અને વિડિયો વાયરલ થયા છે, જેમાં બંધક બનાવાયેલા સૈનિકો દેખાતા હોવાનો દાવો કરવામાં આવ્યો છે. વિડિયોમાં તેઓએ પોતાના ઉચ્ચ અધિકારીઓને BLAની માંગણીઓ સ્વીકારવા અપીલ કરી હોવાનું જણાવવામાં આવે છે.

બલુચિસ્તાનમાં લાંબા સમયથી અલગતાવાદી ચળવળ ચાલી રહી છે. BLAનો આરોપ છે કે પાકિસ્તાની સુરક્ષા દળો દ્વારા બલૂચ નાગરિકો પર દમન, બળજબરીથી ગાયબ કરવાના બનાવો અને માનવ અધિકારોના ઉલ્લંઘન થઈ રહ્યા છે. બીજી તરફ, પાકિસ્તાન સરકાર આ સંગઠનને આતંકવાદી ગૃપ ગણાવી તેના વિરુદ્ધ કડક કાર્યવાહી કરતી આવી છે.