રાજકોટ શહેરમાં કાયદો અને વ્યવસ્થાની સ્થિતિને વધુ મજબૂત કરવા તેમજ ગેરકાયદેસર વસવાટ કરતા તત્વોને ઝડપી પાડવા માટે શહેર પોલીસ દ્વારા એક મોટું અને મહત્વપૂર્ણ ઓપરેશન હાથ ધરવામાં આવ્યું હતું. 'ઓપરેશન બાંગ્લાદેશી' નામ હેઠળ ચલાવવામાં આવેલા આ મેગા ડ્રાઈવમાં પોલીસે સમગ્ર શહેરને બાનમાં લઈ સઘન ચેકિંગ હાથ ધર્યું હતું. આખી રાત ચાલેલા આ ઓપરેશન દરમિયાન પોલીસે અલગ-અલગ વિસ્તારોમાંથી આશરે ૩૧ જેટલા શંકાસ્પદ બાંગ્લાદેશી ઇસમોની અટકાયત કરી છે અને તેમની આકરી પૂછપરછ શરૂ કરી દેવામાં આવી છે.

શહેરના તમામ પોલીસ સ્ટેશન વિસ્તારમાં સ્થાનિક પોલીસ અને ઉચ્ચ અધિકારીઓની અલગ-અલગ ટીમો બનાવીને આ સર્ચ ઓપરેશન હાથ ધરવામાં આવ્યું હતું. જે અંતર્ગત શંકાસ્પદ હલચલ ધરાવતા અથવા કોઈ પણ સત્તાવાર ઓળખ વિના રહેતા ઈસમોને ઝડપી પાડવા માટે રાઉન્ડ ધી ક્લોક કામગીરી કરવામાં આવી હતી. દરેક પોલીસ મથકની હદમાં આવતા વિસ્તારોમાંથી આવા શંકાસ્પદ લોકોને પકડીને સંબંધિત પોલીસ સ્ટેશને લાવવામાં આવ્યા હતા, જ્યાં તેમની રાષ્ટ્રીયતા અને વસવાટના હેતુ અંગે ઊંડાણપૂર્વક તપાસ કરવામાં આવી રહી છે.

આ સમગ્ર ઓપરેશનનું મોનિટરિંગ ઉચ્ચ પોલીસ અધિકારીઓ દ્વારા પ્રત્યક્ષ રીતે કરવામાં આવ્યું હતું. ક્રાઈમ બ્રાન્ચના ડીસીપી જગદીશ બાંગરવા તથા એસીપી ભરત બસિયા સહિતની ઉચ્ચ અધિકારીઓની ટીમ આખી રાત 'સ્ટેન્ડ ટુ' રહી હતી. અધિકારીઓએ સ્થળ પર હાજર રહીને સમગ્ર કામગીરીની સમીક્ષા કરી હતી અને જરૂરી દિશા-નિર્દેશો આપ્યા હતા, જેના કારણે ઓપરેશન અત્યંત સફળ રહ્યું હતું.

પોલીસના જણાવ્યા અનુસાર, પકડાયેલા તમામ શંકાસ્પદ શખ્સોના ઓળખપત્રોની બારીકાઈથી ચકાસણી કરવામાં આવી રહી છે. આ ઇસમો ભારતમાં કઈ રીતે પ્રવેશ્યા અને અહીં કયા આધારે વસવાટ કરી રહ્યા છે તે જાણવા માટે તેમના પાનકાર્ડ, પાસપોર્ટ તેમજ અન્ય ઓળખના દસ્તાવેજો (જેમ કે ભારતીય નાગરિકત્વના પુરાવાઓ) કબ્જે કરીને તેની સત્યતા તપાસવામાં આવી રહી છે. જો આ દસ્તાવેજો બોગસ અથવા ગેરકાયદેસર માધ્યમથી મેળવેલા માલૂમ પડશે, તો તેમની સામે કાયદાકીય અંતર્ગત કડક ગુનો નોંધવામાં આવશે.

આ ઓપરેશન અંતર્ગત શહેરના જાણીતા વેપારી હબ ગણાતા સોની બજાર, ગાંધીગ્રામ વિસ્તાર, તાલુકા પોલીસ સ્ટેશન વિસ્તાર તેમજ ભક્તિનગર પોલીસ સ્ટેશન વિસ્તાર સહિતના અનેક સંવેદનશીલ અને ગીચ વિસ્તારોમાં દરોડા પાડવામાં આવ્યા હતા. આ વિસ્તારોમાં મજૂરી કે અન્ય કામકાજ અર્થે રોકાયેલા શંકાસ્પદ વિદેશી નાગરિકો પોલીસ રડારમાં આવ્યા હતા. હાલમાં આ મામલે સ્થાનિક સ્તરે તપાસ તેજ કરી દેવામાં આવી છે, જ્યારે સમગ્ર ગુજરાત રાજ્યમાંથી કુલ કેટલા બાંગ્લાદેશી શખ્સોની ધરપકડ કરવામાં આવી છે તેની સત્તાવાર અને વિગતવાર માહિતી ટૂંક સમયમાં જ રાજ્યના ગૃહ વિભાગ દ્વારા જાહેર કરવામાં આવશે.