રાજકોટ શહેરમાં આઇવે પ્રોજેક્ટ ૨.૦ અમલી બનાવી તે અંતર્ગત ૩૭ કરોડના ખર્ચે શહેરમાં વધુ ૧૫૦૦ સીસી ટીવી કેમેરા મૂકવા મ્યુનિસિપલ ડ્રાફ્ટ બજેટમાં કમિશનર તુષાર સુમેરાએ જોગવાઇ કરી છે. વર્ષ ૨૦૨૬-૨૦૨૭ના બજેટમાં દર્શાવેલા આ પ્રોજેક્ટનો ખર્ચ રાજ્ય સરકારના સ્વર્ણિમ પ્રોજેક્ટ અંતર્ગત મળશે.

એકંદરે રાજકોટ શહેરમાં હવે કોઇ એવો મુખ્ય વિસ્તાર, મુખ્ય માર્ગ કે ચોક બાકી નહીં રહે કે જ્યાં આગળ સીસી ટીવી કેમેરા મુકાયા ન હોય. હાલ ૨૫૦ લોકેશન પસંદ કરી ત્યાં આગળ કેમેરા મુકાશે. ક્યા વિસ્તારમાં કેમેરા મૂકવા તે હવે નક્કી થશે.

ખાસ કરીને રાજકોટમાં નવા ભળેલા ગામો માધાપર, મુંજકા, મનહરપૂર-૧ (પાર્ટ), મોટા મવા અને ઘંટેશ્વર, ન્યુ રિંગ રોડ સહિતના નવા વિકસતા વિસ્તારો તેમજ કોઠારીયા, વાવડી સહિતના વિસ્તારોમાં કેમેરા મૂકવા વિચારણા હોવાનું જાણવા મળે છે.