રાજકોટ મહાપાલિકાની ચૂંટણીને લઇ આજરોજ મતગણતરી બાદ વિજેતા ઉમેદવારો અને તેના કાર્યકરો દ્વારા જીતની ઉજવણી કરવામાં આવી હતી. શહેર પોલીસ કમિશનરે ગઇકાલે જાહેરનામુ બહાર પાડી વિજય સરઘસ દરમિયાન ફટાકડા ફોડી ઉજવણી કરવા પર પ્રતિબંધ મૂકયો હતો. ત્યારે આ ભાજપે ફટકાડા ફોડી ઉજવણી કરતા આ બાબતે પોલીસ અધિકારીએ જણાવ્યું હતું કે ફટાકડા મેદાનમાં ફોડવામાં આવ્યા છે. જેથી નિયમનો ભંગ થતો નથી.

રાજકોટ મહાપાલિકાની ચૂંટણીને આજે સવારથી મતગણતરી શરૂ થયા બાદ પરિણામ જાહેર થતા વિજેતા ઉમેદવારો અને તેના સમર્થકો દ્વારા જીતની ઉજવણી કરવામાં આવી હતી. શહેર પોલીસ કમિશનર બ્રજેશ કુમાર ઝા દ્વારા વિજય સરઘસ દરમિયાન જાહેર રસ્તા પર ફટાકડા ફોડવા પર પ્રતિબંધ મુકવામાં આવ્યો છે.આ નિયમનો ભંગ કરવા બદલ જાહેરનામા ભંગ અંગેની કાયદેસરની કાર્યવાહી કરવામાં આવશે તેવું જાહેરનામામાં જણાવાયુ હતું. દરમિયાન આજરોજ વોર્ડ નં. ૧૧ માં ભાજપના ઉમેદવાર મહેશભાઇ પીપરીયા, રક્ષિત કલોલા, મિતલરેન લાઠીયા, ભારતીબેન પાડલીયા વિજેતા બનતા વિજય થયેલા ઉમેદવારો અને તેના સમર્થકો દ્વારા જીતની ઉજવણી કરવામાં આવી હતી. દરમિયાન તેમણે ફટાકડા ફોડયા હતાં. જેથી ભાજપના ઉમેદવારોએ નિયમોનું ઉલ્લંઘન કરી ફટાકડા ફોડયા હોવાનીચર્ચા શરૂ થઇ હતી.

આ બાબતે પોલીસ અધિકારીનો સંપર્ક સાધતા તેમણે જણાવ્યું હતું કે, જાહેરનામા મૂજબ જાહેર રસ્તા પર ફટાકડા ફોડવા પર પ્રતિબંધ મૂકવામાં આવ્યો હતો. જયારે આ કિસ્સામાં ફટાકડા જાહેર રસ્તા પર નહીં પરંતુ મેદાનમાં ફોડવામાં આવ્યા છે જેથી જાહેરનામાનો ભંગ થતો નથી.