આજરોજ(22 મે) પટનાના મુખ્ય ન્યાયિક મેજિસ્ટ્રેટની કોર્ટમાં દિલ્હીના મુખ્યમંત્રી અરવિંદ કેજરીવાલ વિરુદ્ધ કેસ દાખલ કરવામાં આવ્યો છે. અરવિંદ કેજરીવાલ પર વડાપ્રધાન નરેન્દ્ર મોદી વિરુદ્ધ વાંધાજનક શબ્દોનો ઉપયોગ કરવાનો આરોપ છે. અરવિંદ કેજરીવાલે 19 મેના રોજ ટ્વિટ કર્યું હતું. આ મામલે ફરિયાદ દાખલ કરવામાં આવી છે.

એડવોકેટ રવિ ભૂષણ પ્રસાદ વર્માએ ભારતીય દંડ સંહિતાની કલમ 332, 500 અને 505 હેઠળ ફરિયાદ કરી છે. ફરિયાદ કેસ નંબર 4908/2023 નોંધીને કોર્ટે આ મામલે સુનાવણી માટે 25 મેની તારીખ નક્કી કરી છે. ફરિયાદ કેસના આરોપો અનુસાર, 19 મેના રોજ કેજરીવાલના ટ્વિટર હેન્ડલ પરથી એક ટ્વિટ કરવામાં આવી હતી, જેમાં વડાપ્રધાન મોદીને અભણ કહેવામાં આવ્યા હતા. તેને માનહાનિકારક કહેવામાં આવ્યું છે.

19 મેના રોજ દિલ્હીના સીએમ અરવિંદ કેજરીવાલના ટ્વિટર હેન્ડલ પરથી એક ટ્વીટમાં લખવામાં આવ્યું હતું- "પહેલા કહ્યું હતું કે 2000ની નોટ લાવવાથી ભ્રષ્ટાચાર બંધ થઈ જશે. હવે તેઓ કહી રહ્યા છે કે 2000ની નોટને નાબૂદ કરવાથી ભ્રષ્ટાચાર ખતમ થઈ જશે. તેથી જ અમે કહીએ છીએ કે, પીએમ શિક્ષિત હોવા જોઈએ. અભણ પીએમને કોઈપણ કંઈ પણ કહી શકે છે. તે સમજી શકતા  નથી અને જનતાને ભોગવવું પડે છે."

હાલ કોંગ્રેસ નેતા રાહુલ ગાંધી વિરુદ્ધ પટનામાં કેસ ચાલી રહ્યો છે. મોદી અટક અંગે ટિપ્પણી કરવામાં આવી હતી. અગાઉ આ જ કેસમાં ગુજરાતની નીચલી અદાલતે તેને બે વર્ષની જેલની સજા ફટકારી હતી. આ પછી તેમની સંસદ સભ્યતા પણ જતી રહી. આ કેસની સુનાવણી હવે હાઈકોર્ટમાં ચાલી રહી છે. હવે અરવિંદ કેજરીવાલ સામે માનહાનિનો કેસ દાખલ કરવામાં આવ્યો છે.