નેપાળની મુલાકાતે ગયેલા ભારતીય વિદેશ મંત્રી એસ જયશંકરે દેશના પૂર્વ વડાપ્રધાન અને સીપીએન યુએમએલના નેતા કેપી શર્મા ઓલી સાથે મુલાકાત કરી છે. જયશંકરે આ બેઠકને ઘણી સારી ગણાવી તો ઓલીએ ભારત સાથેના સંબંધોની પણ પ્રશંસા કરી. ચીનના તાલે નાચતા કેપી ઓલીએ કહ્યું કે ભારત અને નેપાળની સદીઓથી ચાલી રહેલી મિત્રતાને કોઈ બદલી શકે નહીં. જો કોઈ વિવાદ હોય તો ભારત અને નેપાળે તેને વાતચીત દ્વારા ઉકેલવો જોઈએ. ચીન નેપાળમાં પોતાની પક્કડ મજબૂત કરવાના પૂરેપૂરા પ્રયાસ કરી રહ્યું છે અને ભારતના વિદેશ મંત્રીએ નેપાળ સાથે અનેક કરારો કરીને ડ્રેગનને કડક સંદેશ આપ્યો છે. ઉલ્લેખનીય છે કે આ એજ ઓલી છે કે જેણે ભારત વિરુદ્ધ વિવાદાસ્પદ નેપાળી નકશો જારી કર્યો હતો


ઓલીએ જયશંકરને કહ્યું કે નેપાળ અને ભારત વચ્ચે સદીઓથી બનેલા બહુઆયામી સંબંધોને કોઈ બદલી શકે નહીં. પૂર્વ નેપાળી PMએ કહ્યું, 'જો અમારી વચ્ચે કોઈ વિવાદ છે, તો અમારે તેના પર ચર્ચા કરીને તેનો ઉકેલ લાવવો જોઈએ. અમે નેપાળના લોકો ભારત અને ચીન બંનેના આર્થિક વિકાસનો લાભ લેવા માંગીએ છીએ.

 
કેપી ઓલી સાથેની મુલાકાત બાદ જયશંકરે કહ્યું કે તે ખૂબ જ સાર્થક અને સફળ રહી. જયશંકરે ભારત અને નેપાળ વચ્ચે રચાયેલા સંયુક્ત આયોગની બેઠકમાં ભાગ લીધો હતો. આ દરમિયાન નેપાળ પક્ષે ફરિયાદ કરી હતી કે ભારત દ્વારા ફાઇનાન્સ કરાયેલા પ્રોજેક્ટમાં કેટલીક શરતોને કારણે વિલંબ થઈ રહ્યો છે. ભારતીય વિદેશ મંત્રીએ કહ્યું કે આ શરતોની સમીક્ષા કરવામાં આવશે. મહત્વનું છે કે ભારત અને નેપાળ વચ્ચે 10 હજાર મેગાવોટ વીજળીની નિકાસ માટે કરાર કરવામાં આવ્યા  છે. ભારતના વિરોધ છતાં નેપાળી પક્ષે વાટાઘાટો દરમિયાન સરહદ વિવાદનો મુદ્દો ઉઠાવ્યો હતો.
​​​​​​​
 આ સિવાય 1950માં થયેલી મિત્રતા સંધિ પર પણ ચર્ચા થઈ હતી. તે જ સમયે, ભારતે નેપાળની તે માંગને ફરીથી નકારી કાઢી હતી જેમાં તેણે ભૈરવ અને પોખરા એરપોર્ટને હવાઈ માર્ગ પ્રદાન કરવાની વાત કરી હતી. ચીન આ બંને એરપોર્ટના નિર્માણમાં સામેલ છે. ભારતના વિરોધ છતાં ઓલી સરકારે ચીનને કોન્ટ્રાક્ટ આપ્યો હતો. વડાપ્રધાન તરીકેના પોતાના કાર્યકાળ દરમિયાન ઓલી તત્કાલીન ચીનના રાજદૂત હાઓ યાન્કીના નિર્દેશોનું પાલન કરતા હતા અને અયોધ્યા સહિત અનેક મુદ્દાઓ પર વિવાદિત  નિવેદનો આપી ચૂક્યા છે