સ્કુલ ઓફ આર્કિટેક્ચર (CEPT યુનિવર્સિટી)ના સ્થાપક અને નિર્દેશક પ્રો. બાલકૃષ્ણ દોશીનું 95 વર્ષની વયે આજરોજ સવારે નિધન થયું છે. 


વર્ષ 1962માં પ્રો. બાલકૃષ્ણ દોશીએ કસ્તુરભાઈ લાલભાઈ, ચેરમેન, AES, અને ડો. આર.એન. વકીલ તથા બર્નાર્ડ કોહન સહિતના વ્યાવસાયિકોના જૂથના સમર્થનથી સ્કૂલ ઑફ આર્કિટેક્ચર (CEPT યુનિવર્સિટી) ફેકલ્ટીની શરૂઆત કરી હતી. આ બાદ વર્ષ 1972માં તેમણે પ્રો. ક્રિસ્ટોફર ચાર્લ્સ બેનિંગર સાથે મળીને સ્કૂલ ઓફ પ્લાનિંગની સ્થાપના કરી અને તેના ડિરેક્ટર તરીકે પ્રમુખપદ સંભાળ્યું હતું. તે જ વર્ષે, સેન્ટર ફોર એન્વાયર્નમેન્ટલ પ્લાનિંગ એન્ડ ટેક્નોલોજી (CEPT)ના પ્રથમ સ્થાપક અને ડીન હતા. 

આ ઉપરાંત તેઓ રાષ્ટ્રીય અને આંતરરાષ્ટ્રીય ક્ષેત્રે જાણીતી એવી સંસ્થા - વાસ્તુ-શિલ્પ ફાઉન્ડેશન ફોર સ્ટડીઝ ઍન્ડ રીસર્ચ ઇન એનવાયરમેંટલ ડિઝાઈનની સ્થાપનામાં સક્રીય હતા. 

તેમના નોંધનીય કાર્યોમાં ઈન્ડિયન ઇન્સ્ટીટ્યૂટ ઑફ મેનેજમેંટ બેંગ્લોર અને  આગાખાન ઍવોર્ડ ઑફ આર્કીટેક્ચર મેળવેલ અરણ્ય લો કોસ્ટ હાઉસિંગ ડેવેલોપમેંટ, ઈન્દોર નો સમાવેશ થાય છે. આર્કિટેક્ચર માટે સર્વોચ્ચ ખિતાબ મનાતા પ્રીઝકર પ્રાઈઝ મેળવનાર તેઓ પ્રથમ ભારતીય આર્કિટેક્ટ હતા.  તેઓ રોયલ ઇન્સ્ટિટ્યૂટ ઑફ બ્રિટિશ આર્કિટેક્ટ અને ઇન્ડિયન ઇન્સ્ટિટ્યૂટ ઑફ આર્કિટેક્ટના ફેલો હતા.  તેમને વર્ષ 2020 માં પદ્મ ભૂષણ પુરસ્કાર એનાયત કરવામાં આવ્યો હતો. આ ઉપરાંત વર્ષ 2022માં, ધ રોયલ ઇન્સ્ટિટ્યૂટ ઑફ બ્રિટિશ આર્કિટેક્ટ્સ (RIBA) એ તેમના જીવનભરના કાર્યની માન્યતામાં, તેમને રોયલ ગોલ્ડ મેડલ એનાયત કર્યો હતો.


પ્રો. બાલકૃષ્ણ દોશીએ સમગ્ર દેશમાં અને સમગ્ર વિશ્વમાં CEPT ખાતે આર્કિટેક્ટ, વિદ્યાર્થીઓ અને શિક્ષણવિદોની પેઢીઓને પ્રભાવિત કરી છે. પ્રો. દોશીનું કાર્ય ભારતીય સંદર્ભમાં મૂળ આધુનિક સ્થાપત્ય માટે તેમની જીવનભરની શોધને પ્રતિબિંબિત કરે છે. 

તેમણે તેમના અભ્યાસ અને શિક્ષણ બંને દ્વારા સ્થાપત્યના કાર્યોને નવો વળાંક આપ્યો છે.  તેમની ઇમારતો આધુનિકતાને સ્થાનિક ભાષા સાથે જોડે છે. CEPT યુનિવર્સિટીમાં સ્કૂલ ઑફ આર્કિટેક્ચર બિલ્ડિંગએ આર્કિટેક્ચર પ્રત્યેના તેમના પોતાના અભિગમનું જ નહીં, પરંતુ ભારતમાં આધુનિક આર્કિટેક્ચરની મહાન પરંપરાનું પણ શ્રેષ્ઠ ઉદાહરણ છે.