જેતપુરના ધારેશ્ર્વર વિસ્તારમાં આવેલી જીઆઇડીસીના કારખાનેદારો દ્વારા ખુલ્લેઆમ ભાદર નદીમાં સાડી ઉદ્યોગનું પ્રદૂષિત પાણી છોડાતું હોવાની ફરિયાદો ઉઠી છે. જેતપુરમાં ઘણા દિવસોથી ખુબ જ સારો વરસાદ થવાથી ભાદર નદીમાં ભારે પૂર આવવાથી તમામ પ્રદૂષિત પાણી દરિયામાં વહી ગયેલ હોય અને હાલ ભાદર નદી એકદમ ચોખ્ખી હોય, પરંતુ જેતપુરના અમુક કારખાનેદારો દ્વારા ભુગર્ભ ગટર તેમજ ખુલ્લેઆમ પ્રદૂષિત પાણી ફરી ભાદરમાં છોડાઇ રહ્યું છે. જેથી ગઇકાલે જીપીસીબીના અધિકારીઓની ટીમએ ધર્મેન્દ્ર વાંકાણી અને વિનોદ પરમાર દ્વારા ધારેશ્ર્વર જીઆઇડીસીના ફિલ્ટર પ્લાન્ટનું પાણી જે ખુલ્લેઆમ ભાદર નદીમાં છોડવામાં આવેલ હતું તે પ્રદૂષિત પાણીના નમુના લઇ અને કાયદેસર કાર્યવાહી કરેલ છે. હાલ જેતપુરના અમુક કારખાનેદારો બેફામ ભાદર નદીમાં ખુલ્લેઆમ પ્રદૂષિત પાણી છોડી રહ્યા છે તેમની સામે યોગ્ય પગલાં લે તેવી લોક માગ ઉઠી છે.