કુસ્તીબાજ બજરંગ પુનિયા સરકાર સાથે વાતચીત માટે બોલાવ્યા બાદ કેન્દ્રીય રમતગમત મંત્રી અનુરાગ ઠાકુરના ઘરે તેમને મળવા પહોંચ્યા છે. તેના થોડા સમય બાદ રેસલર સાક્ષી મલિક અને તેના પતિ સત્યવ્રત કડિયાન પણ અનુરાગ ઠાકુરના ઘરે પહોંચ્યા હતા. જો કે, વીનેશ ફોગાત આ મીટીંગમાં શામેલ નથી થઇ. આ પહેલા ગૃહમંત્રી અમિત શાહ સાથેની બેઠકમાં પણ તેની શામેલ થઇ ન હતી.

એક દિવસ પહેલા મંગળવારે (6 જૂન) કેન્દ્રીય મંત્રી અનુરાગ ઠાકુરે બ્રિજ ભૂષણ વિરુદ્ધ આંદોલન કરી રહેલા ખેલાડીઓને વાતચીત માટે આમંત્રણ મોકલ્યું હતું. અનુરાગ ઠાકુરે ટ્વીટ કર્યું હતું કે સરકાર કુસ્તીબાજો સાથે વાતચીત કરવા તૈયાર છે. આ માટે મેં તેમને ફરી એકવાર આમંત્રણ મોકલ્યું છે.

વાટાઘાટો માટે પહોંચતા પહેલા, આંદોલનમાં સામેલ કુસ્તીબાજ સાક્ષી મલિકે કહ્યું કે સરકારના પ્રસ્તાવ પર બધાની સંમતિ પછી જ નિર્ણય લેવામાં આવશે. વિરોધ સમાપ્ત કરવા અંગે તેમણે કહ્યું હતું કે અમે સરકારની વાત સાંભળીશું. એવું નહીં થાય કે અમે સરકારની કોઈ વાત સ્વીકારીએ અને અમારો વિરોધ સમાપ્ત કરીએ.

અગાઉ 3 જૂને આંદોલનકારી કુસ્તીબાજોએ કેન્દ્રીય ગૃહ પ્રધાન અમિત શાહ સાથે બેઠક કરી હતી. આ બેઠકને સરકાર દ્વારા કુસ્તીબાજોના મામલામાં મડાગાંઠ તોડવાના પ્રયાસ તરીકે જોવામાં આવી હતી.

ગૃહમંત્રીને મળ્યાના બે દિવસ બાદ 5 જૂને કુસ્તીબાજ સાક્ષી મલિક અને બજરંગ પુનિયા તેમની નોકરી સંબંધિત કામ માટે રેલવે ઓફિસ પહોંચ્યા હતા. એવો દાવો કરવામાં આવ્યો હતો કે આ કુસ્તીબાજોએ પ્રદર્શનથી પોતાને દૂર રાખ્યા હતા. જો કે, બંનેએ સ્પષ્ટ કર્યું હતું કે તેઓએ તેમની લડાઈ છોડી નથી. તેમણે ટ્વીટ કર્યું કે જ્યાં સુધી ન્યાય નહીં મળે ત્યાં સુધી લડત ચાલુ રહેશે. જો મારે આ માટે મારી નોકરી છોડવી પડશે તો હું છોડી દઈશ.