ભાઈ-બહેનના પવિત્ર સંબંધને રેશમના દોરા વડે અતૂટ બંધનને વધુ મજબૂત કરવાનો અવસર એટલે 'રક્ષાબંધન'. આ પવિત્ર પર્વને આડે હવે ગણતરીના દીવસો જ બાકી છે. ત્યારે દેશની રક્ષા કરનાર વીર જવાનોની રક્ષા માટે રાજકોટ શહેરની લાલ બહાદુર શાસ્ત્રી કન્યા વિદ્યાલયની છાત્રાઓએ રક્ષકની સુરક્ષા પ્રોજેકટ અંતર્ગત રાખડી બનાવી છે. પોતાની હાથે 550 છાત્રાઓએ બનાવેલી 1111 જેટલી રાખડીઓ ભારતીય સેનાનાં જવાનોને મોકલી સાથે એક પત્ર આપી રક્ષાબંધન સાથે દેશભક્તિનું પણ ઉત્તમ ઉદાહરણ પુરૂ પાડ્યું છે. ઉલ્લેખનીય છે કે આ એક રાખડી બનાવતા વિદ્યાર્થીઓને 2-4 કલાક જેટલો સમય લાગ્યો છે.

દેશની રક્ષા કરવા સરહદ પર કડકડતી ઠંડી, તડકો, વરસાદમાં દુશ્મનોની ગોળીનો સામનો કરતા સૈન્યના જવાનોને રક્ષાબંધનના પવિત્ર તહેવાર નિમિત્તે લાલ બહાદુર શાસ્ત્રી કન્યા વિદ્યાલયની છાત્રાઓએ દ્વારા અવનવી, કલાત્મક રાખડીઓ બનાવી રાખડીઓ સરહદ પરના સૈનિકોને મોકલવામાં આવશે. અંગે શાળાના આચાર્ય ભરતસિંહ પરમારે કહ્યું હતું કે, દેશના જવાનો દિવસ-રાત 24 કલાક દેશની સુરક્ષા માટે જ ફરજ બજાવી રહ્યા છે. અમારી શાળાની વિદ્યાર્થીઓએ પોતાની જાતે જ હેન્ડ મેઇડ રાખડીઓ બનાવી છે. અમારા વિદ્યાર્થીની લાગણી છે કે, જવાનો ઘર-પરિવાર ભૂલીને દેશ માટે ફરજ બજાવી રહ્યા છે. ત્યારે અમારા સૌની આશા, પ્રાર્થના અને દુઆ હંમેશા એ રહેશે કે જવાનો સદાય સલામત રહે અને દેશ માટે જે ખૂબ સરસ કાર્ય કરી રહ્યા છો તેમાં આગળ વધો.