દરિયાકિનારાથી 4.3 નોટિકલ માઈલના અંતરે આવેલ અજાડ ટાપુ ખાતે આયોજન

લોકસભા સામાન્ય ચૂંટણીમાં દેવભૂમિ દ્વારકા જિલ્લાના અજાડ ટાપુ પર પ્રિસાઈડિંગ ઓફીસર, પોલિંગ ઓફીસર સહિતનો સ્ટાફ ઈવીએમ અને વીવીપેટ મશીન સહિતની સામગ્રી સાથે પહોંચી ગયો છે અને મતદાન શરૂ થઇ ચૂક્યું છે.

ઉલ્લેખનિય છે કે, 68-અજાડ ટાપુ મતદાન મથક દેવભૂમિ દ્વારકાના 81-ખંભાળિયા મતવિસ્તારમાં આવેલું છે, જે ટાપુ દરિયા કિનારાથી લગભગ 10 કિ.મી. દૂર છે. આ વિસ્તારના માત્ર 40 મતદારો માટે તંબુમાં મતદાન મથક તૈયાર કરવામાં આવ્યા હતા, જિલ્લા ચૂંટણી તંત્ર દ્વારા આ ટાપુ પર એક મતદાન મથક સ્થાપિત કરવામાં આવ્યા છે, જેથી મતદારો તેમના મત આપવાના મૂળભૂત અધિકારથી વંચિત ન રહે. પરિવહનનો એકમાત્ર રસ્તો બોટ છે, આ મતદાન મથક ખાતે મતદાન સ્ટાફને મોટા આસોટાથી 13 કિ.મી. જેટલા રસ્તા મારફતે ગડુ વિસ્તાર પહોંચી ત્યાંથી બોટ મારફત અંદાજિત 4.3 નોટીકલ માઇલ દરિયાઇ મુસાફરી કરે છે અને મતદાન મશીનો સાથે તમામ જરૂરી સામગ્રી લઈ જાય છે અને આજે સવારથી જ મતદાન શ થઇ જતાં લોકોમાં આનંદની લાગણી જન્મી છે.