રાજકોટના TRP અગ્નિકાંડ બાદ મ્યુનિસિપલ કોર્પોરેશનના વધુ એક અધિકારી એન્ટી કરપ્શન બ્યુરો (ACB)ના સકંજામાં આવ્યા છે. તત્કાલીન આસિસ્ટન્ટ ટાઉન પ્લાનર અને હાલમાં એક્ઝિક્યુટિવ એન્જિનિયર તરીકે ફરજ બજાવતા અજયભાઈ મનસુખભાઈ વેગડ સામે અપ્રમાણસર મિલકતનો ગુનો નોંધવામાં આવ્યો છે. ACBની તપાસમાં તેમની આવક કરતાં 75 લાખ રૂપિયાથી વધુની સંપત્તિ બહાર આવી છે, જે તેમની આવક કરતાં 38.76 ટકા વધુ છે.

ACBની તપાસ દરમિયાન જાણવા મળ્યું છે કે 1 એપ્રિલ 2014 થી 3 જૂન 2024 સુધીના સમયગાળામાં અજયભાઈ વેગડના ખાતામાં અલગ-અલગ ચેક મારફતે લગભગ 65 લાખ રૂપિયા જમા થયા હતા. આટલી મોટી રકમ જમા થતાં ACBને શંકા ગઈ હતી, જેના કારણે તપાસ હાથ ધરવામાં આવી હતી.

આ કેસમાં ACBએ અજયભાઈ વેગડ સામે ભ્રષ્ટાચાર નિવારણ અધિનિયમ, 1988ની કલમ 13(1)(b) અને 13(2) હેઠળ ગુનો નોંધ્યો છે. ACB આ મામલે વધુ તપાસ કરી રહી છે અને અજયભાઈ વેગડની અન્ય સંપત્તિઓ વિશે પણ માહિતી મેળવવાનો પ્રયાસ કરી રહી છે.