ગુજરાત હાઈકોર્ટે એક કેસની સુનાવણી દરમિયાન કહ્યું હતું કે, કર્મચારીને તેની અર્ન્ડ લીવ (EL)ની રોકડ રકમ ન આપવી એ બંધારણીય અધિકારોનું ઉલ્લંઘન છે. ગુજરાત હાઈકોર્ટે અમદાવાદ મ્યુનિસિપલ કોર્પોરેશન AMCની અરજીને ફગાવી દીધી હતી. જેમાં AMCએ લેબર કોર્ટના આદેશને પડકાર્યો હતો. આદેશ હેઠળ, લેબર કોર્ટે નિવૃત્ત કર્મચારીને લીવ એન્કેશમેન્ટના નાણાં ચૂકવવા કોર્પોરેશનને આદેશ કર્યો હતો.

સદરીનભાઈ સોલંકીની 1975માં અમદાવાદ મ્યુનિસિપલ કોર્પોરેશનના ટેક્નિકલ વિભાગમાં કર્મચારી તરીકે ભરતી કરવામાં આવી હતી. સદરીનભાઈ 2013 સુધી જુનિયર ક્લાર્ક તરીકે કામ કરતા હતા, પરંતુ વિભાગીય પરીક્ષા પાસ ન થવાને કારણે તેમને હેલ્પરના પદ પર ઉતારી દેવામાં આવ્યા હતા. તેઓએ 5 માર્ચ 2013ના રોજ રાજીનામું આપ્યું, પરંતુ AMCએ સાત મહિના સુધી જવાબ ન આપ્યો અને સ્વીકૃતિ માટે એક મહિનાનો નોટિસ સમયગાળો નક્કી કર્યો હતો. કોઈ ઉકેલ ન આવતા, સદરીનભાઈ 30 એપ્રિલ 2014ના રોજ નિવૃત્ત થયા હતા. જ્યારે તેઓએ તેમની કમાયેલી રજા (જે અંદાજે રૂ.2.80 લાખ હતી) રોકડ કરવાની માગણી કરી, ત્યારે કોર્પોરેશને તેને નકારી કાઢી. 

મ્યુનિસિપલ કોર્પોરેશને કહ્યું કે, રાજીનામું આપનાર સદરીનભાઈ અનધિકૃત રજા પર હતા અને તેથી તેઓ આ લાભ માટે હકદાર નથી. હાઈકોર્ટે કોર્પોરેશનની દલીલને નકારી કાઢી હતી અને લેબર કોર્ટના આદેશનું પાલન કરવાનો નિર્દેશ આપ્યો હતો. આ નિર્ણયે કર્મચારીઓના તેમના કાર્યકાળ દરમિયાન મેળવેલા લાભોનો દાવો કરવાના અધિકારને સમર્થન આપ્યું છે, એમ કહીને કે, આ અધિકાર બંધારણ હેઠળ સુરક્ષિત છે.

જસ્ટિસ એમ.કે. ઠક્કરે લેબર કોર્ટના આદેશને સમર્થન આપતાં કહ્યું હતું કે, રજા રોકડ રકમ પગારની જેમ છે, જે એક સંપત્તિ છે. માન્ય કાનૂની જોગવાઈ વિના વ્યક્તિને તેની મિલકતથી વંચિત રાખવી એ બંધારણનું ઉલ્લંઘન છે. જો કોઈ કર્મચારીએ રજા મેળવી હોય અને તેની કમાયેલી રજાને રોકડમાં રૂપાંતરિત કરવાનું પસંદ કર્યું હોય તો તેનો રોકડીકરણનો અધિકાર બની જાય છે. કોઈપણ અધિકૃતતા વિના કોર્પોરેશન દ્વારા તે અધિકારનું ઉલ્લંઘન થઈ શકે નહીં.