અમદાવાદની જાણિતી યુ.એન. મહેતા હોસ્પિટલમાંથી બે બંદૂક સાથે બે શખસની ધરપકડ કરવામાં આવી છે. ગુજરાત એટીએસને આ અંગે ગુપ્ત માહિતી મળી હતી. જેને લઈને ગુજરાત એટીએસએ આ ઓપરેશન હાથ ધરી બન્ને શખસને હથિયાર સાથે ઝડપી પાડ્યા છે.  

પકડાયેલા બંને શખસ ગુજરાતના નથી
એટીએસના અધિકારીઓ સિવિલ ડ્રેસમાં આવ્યા હતા અને કોઈ જ શંકા ન જાય તેવી રીતે બે લોકોને ઝડપી પાડયા હતા. બે શખસની ધરપકડ બાદ એટીએસની ટીમ હોસ્પિટલનો સમગ્ર વિસ્તાર સુરક્ષિત કર્યા પછી રવાના થઈ હતી.  ગુજરાત એટીએસના DySP વિરજીત પરમારના જણાવ્યા અનુસાર બે શકમંદો આ વિસ્તારમાં આવી રહ્યા છે તેવી અમને જાણકારી હતી. જેના આધારે અમે સફળતાપૂર્વક ઓપરેશન પાર પાડ્યું હતિું. ઝડપાયેલા બંને શખસ મૂળ ગુજરાતનાં નથી, FIRની પ્રક્રિયા ચાલી રહી છે.

હોસ્પિટલના ગેટ પરથી જ બંનેને ઝડપ્યા
બે વ્યક્તિ હથિયાર લઈને યુ.એન. મહેતા હોસ્પિટલ આવી રહ્યા છે તેવી માહિતી એટીએસને મળી હતી. આથી તાત્કાલિક આસપાસના વિસ્તારમાં એટીએસએ ટીમ તહેનાત કરી દીધી હતું. ગઈકાલે બપોરના સવા ચાર વાગ્યે એટીએસની ટીમે હોસ્પિટલના ગેટ પર બે શકમંદને રોક્યા અને બે બંદૂક સાથે ઝડપી પાડ્યા હતા.