આગરાના શાહગંજના શિવ નગરમાં આજે સવારે મંદિરમાં પૂજા દરમિયાન છત ધસી પડી હતી. કાટમાળ નીચે અંદાજે 10 લોકો દટાયા હોવાની આશંકા છે. સ્થળ પર એકઠા થયેલા લોકોએ કાટમાળ નીચે દટાયેલા લોકોને બહાર કાઢ્યા હતા. એક બાળકીનું મોત થયું હતું. અકસ્માતના પગલે ઘણા લોકોની હાલત ગંભીર હોવાનું કહેવાય છે. પોલીસ દ્વારા ઘાયલોને હોસ્પિટલમાં દાખલ કરવામાં આવ્યા છે.

આ ઘટના સવારે આઠ વાગ્યાની આસપાસ બની હતી. શિવ નગરના મહાવીર નગરમાં આવેલા શિવ મંદિરમાં સોમવાર હોવાથી મોટી સંખ્યામાં ભક્તો ઉમટ્યા હતા. લોકો જલાભિષેક કર્યા બાદ પૂજા કરતા હતા. દરમિયાન મંદિરના વરંડાની છત એકાએક ધરાશાઈ થઇ ગઈ હતી. જેના કારણે ત્યાં હાજર શ્રદ્ધાળુઓ કાટમાળ નીચે દટાઈ ગયા હતા. લોકોમાં હોબાળો મચી ગયો હતો. આસપાસના લોકો ઘટના સ્થળે પહોંચી ગયા હતા. તેઓએ કાટમાળમાં દટાયેલા લોકોને બહાર કાઢવાની કામગીરી શરૂ કરી હતી.

અકસ્માતની માહિતી મળતા પોલીસ અને અધિકારીઓ પણ પહોંચી ગયા હતા.લોકોની મદદથી પોલીસે કાટમાળ નીચે દટાયેલા લોકોને બહાર કાઢ્યા હતા. તેને હોસ્પિટલમાં મોકલવામાં આવ્યો હતો, જ્યાં ડોક્ટરોએ એક છોકરીને મૃત જાહેર કરી હતી. ઘાયલોમાં ઘણાની હાલત ગંભીર હોવાનું કહેવાય છે. કહેવાય છે કે ભીનાશને કારણે વરંડાની છત જર્જરિત થઈ ગઈ હતી.