ચીન હાલના દિવસોમાં કુદરતી આફતોના બેવડા પ્રહારનો સામનો કરી રહ્યું છે. દેશના ઘણા વિસ્તારો પહેલાથી જ વિનાશક પૂરની ઝપેટમાં છે, જેમાં આશરે છ જેટલી પ્રમુખ નદીઓ ભયજનક સપાટીથી ઉપર વહી રહી છે. આ પૂરના કારણે અંદાજે એક લાખ જેટલા લોકો ઘરવિહોણા થઈ ચૂક્યા છે. આવી કપરી પરિસ્થિતિ વચ્ચે હવે ચીન પર સમુદ્ર તરફથી 'સુપર ટાઇફૂન બાવી' નામનું અત્યંત શક્તિશાળી વાવાઝોડું ત્રાટકવાની ભીતિ સેવાઈ રહી છે. આ ભયાનક વાવાઝોડાને પગલે ચીન સરકાર અને વહીવટી તંત્ર યુદ્ધના ધોરણે બચાવ કામગીરીમાં લાગી ગયું છે. અત્યાર સુધીમાં 20 જેટલા લોકો વાવાઝોડાનો ભોગ બન્યા છે.

??CHINA

?TIERRA FIRME: Tras cruzar el Pacífico occidental durante 11 días, el tifón Bavi ha tocado tierra por tercera y última vez en la ciudad de Yuhuan, China (justo al noreste de Wenzhou), con vientos de 90 mph (145 km/h) y una presión de 952 mbar. pic.twitter.com/j3Kf07ppbX

— FILIPINA NEWS 507 (@agrimensuraferg) July 11, 2026

ચક્રવાતની ગંભીરતાને ધ્યાનમાં રાખીને ચીને શનિવારે સવાર સુધીમાં જ દરિયાકાંઠાના અને નીચાણવાળા વિસ્તારોમાંથી આશરે ૨૦ લાખ જેટલા નાગરિકોને સુરક્ષિત સ્થળોએ ખસેડવાની પ્રશંસનીય કામગીરી કરી છે. ટાઇફૂન 'બાવી'ને પહોંચી વળવા માટે તમામ સમુદ્રી વિસ્તારો ખાલી કરાવી દેવામાં આવ્યા છે અને અંદાજે ૧૭,૦૦૦ જેટલા ઇમર્જન્સી રેસ્ક્યુ વર્કર્સ (બચાવકર્મીઓ)ને હાઈ એલર્ટ પર રાખવામાં આવ્યા છે. સંભવિત પ્રભાવિત વિસ્તારોની તમામ શાળાઓ અને કોલેજો શનિવારે બંધ રાખવામાં આવી હતી. આ ઉપરાંત, સલામતીના ભાગરૂપે દરિયાઈ ફેરી સર્વિસ સસ્પેન્ડ કરી દેવાઈ છે અને હજારો આંતરરાષ્ટ્રીય તથા સ્થાનિક ફ્લાઇટ્સ રદ કરવામાં આવી છે.

ચીન તરફ આગળ વધતા પહેલા આ વાવાઝોડાએ ફિલિપાઇન્સ, જાપાન અને તાઇવાનમાં ભારે તારાજી સર્જી છે, જ્યાં અત્યાર સુધીમાં ૨૦થી વધુ લોકોએ પોતાના જીવ ગુમાવ્યા છે. ફિલિપાઇન્સના ગ્રામીણ વિસ્તારોમાં વાવાઝોડાના કારણે ૧૦ લોકોના મોત થયા છે, જેમાંથી કાલાનોગાસ ટાઉનમાં થયેલા ભયાનક ભૂસ્ખલનને લીધે જ પાંચ લોકો દટાઈ ગયા હતા, જ્યારે છથી વધુ લોકો હજુ પણ ગુમ છે. ફિલિપાઇન્સમાં ૨૦ હજારથી વધુ લોકોને સુરક્ષિત સ્થળે ખસેડીને તેમના માટે ૧૦૦ જેટલા ઇમર્જન્સી શેલ્ટર હોમ બનાવવામાં આવ્યા છે.

બીજી તરફ, તાઇવાન અને જાપાન પણ આ ચક્રવાતની ચપેટમાં આવ્યા છે. તાઇવાનમાં આ આફતના કારણે આશરે ૧૧૩ લોકો ઘાયલ થયા છે અને ૧૫,૦૦૦થી વધુ લોકોને સલામત સ્થળે આશ્રય આપવો પડ્યો છે. જાપાનના ઓકીનાવા ટાપુ પર ભારે પવન સાથે ત્રાટકેલા આ વાવાઝોડાને કારણે જનજીવન અસ્તવ્યસ્ત થઈ ગયું હતું અને ૨૦૦થી વધુ ફ્લાઇટ્સ રદ કરવી પડી હતી. હવે આ વાવાઝોડું તાઇવાનથી આગળ વધીને ચીનની સાવ નજીક પહોંચી ગયું છે, જેથી ચીનના દરિયાકાંઠાના વિસ્તારો જેવા કે તાઇઝોઉ અને જીન્જીદાઓ સહિતના ટાપુઓ પર હાઈ એલર્ટ જાહેર કરાયું છે.

હવામાન વિભાગના જણાવ્યા અનુસાર, સુપર ટાઇફૂન 'બાવી'ની સૌથી વિપરીત અસર ચીનના ઝેજીઆંગ પ્રાંત પર થવાની સંભાવના છે, જ્યાં આશરે એક કરોડ લોકોની વસ્તી વસે છે. હાલમાં ચીનના પૂર્વોત્તર દરિયા કિનારે ભારે મોજા ઉછળી રહ્યા છે અને સ્થિતિ ચિંતાજનક બની છે. ઝેજીઆંગ પ્રાંતમાંથી જ ૨૦ લાખ લોકોને પડોશી પ્રાંત ફુજિઆનમાં સુરક્ષિત રીતે શિફ્ટ કરવામાં આવ્યા છે. સ્થાનિક હવામાન કેન્દ્ર દ્વારા સમગ્ર પ્રાંત માટે 'ઓરેન્જ એલર્ટ' જારી કરવામાં આવ્યું છે. રવિવારે વહેલી સવારે જ આ વાવાઝોડું ૧૪૪ કિલોમીટર પ્રતિ કલાકની પ્રચંડ ઝડપે ચીનના કિનારે ત્રાટકશે તેવા અનુમાનને પગલે સ્થાનિક નાગરિકોમાં ભારે ભય અને ચિંતાનો માહોલ જોવા મળી રહ્યો છે.