કેન્દ્ર સરકાર દ્વારા દેશભરના વરિષ્ઠ સનદી અધિકારીઓના સ્તરમાં મોટા ફેરફાર કરવાની જાહેરાત કરવામાં આવી છે. આ અંતર્ગત ગુજરાત કેડરના ત્રણ બાહોશ IAS અધિકારીઓને ભારત સરકારના વિવિધ મંત્રાલયોમાં એડિશનલ સેક્રેટરી (અધિક સચિવ) તરીકે પ્રમોશન આપીને નવી અને મહત્વની જવાબદારીઓ સોંપવામાં આવી છે.​​​​​​​

ગુજરાતના આ ત્રણ અધિકારીઓને મળી ઉચ્ચ જવાબદારી

કેન્દ્ર સરકારના લેટેસ્ટ આદેશ અનુસાર, ગુજરાત કેડરના અનુભવી અધિકારીઓને તેમની કાર્યક્ષમતાના આધારે ઉચ્ચ સ્તરીય હોદ્દા પર બઢતી આપવામાં આવી છે:

એમ.કે. ખંધાર (1996 બેચ): 1996 બેચના વરિષ્ઠ અધિકારી એમ.કે. ખંધારને કેન્દ્રમાં સામાજિક ન્યાય અને સશક્તિકરણ વિભાગમાં અધિક સચિવ તરીકે નિયુક્ત કરવામાં આવ્યા છે.

આરતી કંવર (2001 બેચ): 2001 બેચના અધિકારી આરતી કંવરને ટેક્સટાઇલ મંત્રાલયમાં અધિક સચિવ તરીકેની મહત્વની જવાબદારી સોંપાઈ છે.

વિજય નેહરા (2001 બેચ): ગુજરાતમાં મ્યુનિસિપલ કમિશનર સહિતની મહત્વની ભૂમિકાઓ ભજવનાર વિજય નેહરાને હવે કેન્દ્રના આરોગ્ય અને પરિવાર કલ્યાણ વિભાગમાં અધિક સચિવ તરીકે પ્રમોશન આપવામાં આવ્યું છે.

PMOમાં પણ કદ વધ્યું

માત્ર ગુજરાત કેડર જ નહીં, પણ પ્રધાનમંત્રી કાર્યાલય (PMO)માં કાર્યરત અધિકારીઓના કદમાં પણ વધારો કરવામાં આવ્યો છે. PMOમાં ફરજ બજાવતા શ્રીધર ચિરુવોલુને પણ અધિક સચિવ તરીકે પ્રમોશન આપીને તેમના હોદ્દામાં વધારો કરાયો છે. આ ઉપરાંત, નિમણૂક સમિતિએ કેટલાક અધિકારીઓને તેમના વર્તમાન હોદ્દા પર જ 'ઇન-સિટુ' (In-situ) અપગ્રેડેશન આપીને અધિક સચિવનો દરજ્જો આપવાનો નિર્ણય કર્યો છે.

વહીવટી તંત્રમાં ફેરફારનો હેતુ

કેન્દ્ર સરકાર દ્વારા કરવામાં આવેલા આ ફેરફારો પાછળનો મુખ્ય હેતુ વિવિધ મંત્રાલયોમાં અનુભવી અધિકારીઓની નિમણૂક કરીને સરકારી યોજનાઓ અને વહીવટી પ્રક્રિયાને વધુ વેગવંતી બનાવવાનો છે. ગુજરાત કેડરના આ ત્રણેય અધિકારીઓ રાજ્યમાં લાંબો અનુભવ ધરાવે છે, જેનો લાભ હવે કેન્દ્ર સરકારના વિવિધ વિભાગોને મળશે. આ પ્રમોશનને પગલે ગુજરાતના વહીવટી આલમમાં ખુશીનો માહોલ જોવા મળી રહ્યો છે.