લેબનોનના દક્ષિણ ગવર્નરેટ નાબાતીહના હબ્બૌશ શહેરમાં શનિવારે સવારે પણ બચાવ કામગીરી પુરજોશમાં ચાલી રહી હતી. શુક્રવારે થયેલા ભીષણ ઇઝરાયેલી હવાઈ હુમલા બાદ આજે સવારે રાહતકર્મીઓ વિનાશક હુમલામાં ધરાશાયી થયેલી ઇમારતોના કાટમાળને હટાવી રહ્યા હતા. લેબનીઝ સ્ટેટ ન્યૂઝ એજન્સીના અહેવાલ મુજબ આ હુમલામાં અત્યાર સુધીમાં 8 લોકોના મોતની પુષ્ટિ થઈ છે.

હુમલાની વિગત
ગઈકાલે શુક્રવારે ઇઝરાયેલી સેના દ્વારા વિસ્તાર ખાલી કરવાના આદેશ આપવામાં આવ્યા હતા અને તેના એક કલાકથી પણ ઓછા સમયમાં હબ્બૌશ પર શ્રેણીબદ્ધ હુમલાઓ કરવામાં આવ્યા હતા. આ હુમલાને કારણે આખું શહેર ધૂમાડાના ગોટેગોટામાં ફેરવાઈ ગયું હતું, જેના દ્રશ્યો આસપાસના વિસ્તારોમાંથી પણ સ્પષ્ટપણે જોઈ શકાતા હતા.

ભયાનક આંકડાઓ
લેબનીઝ સત્તાવાળાઓ દ્વારા આપવામાં આવેલી માહિતી અનુસાર ૨ માર્ચથી ઇઝરાયેલ અને હિઝબુલ્લાહ વચ્ચે શરૂ થયેલા વર્તમાન સંઘર્ષમાં અત્યાર સુધીમાં ૨,૫૦૦ થી વધુ લોકોના મોત નીપજ્યા છે અને ૧.૨ મિલિયનથી વધુ લોકોએ પોતાના ઘર છોડવા પડ્યા છે. જોકે ૧૬ એપ્રિલના રોજ થયેલા કરાર બાદ બેરૂત અને તેના ઉપનગરોમાં હુમલા અટક્યા હતા, પરંતુ લેબનોનના અન્ય વિસ્તારોમાં આ સંઘર્ષ હજુ પણ સતત ચાલુ રહ્યો છે.

​​​​​​​હાલમાં ઘટનાસ્થળે કાટમાળ હટાવવાની કામગીરી ચાલુ છે જેથી જો કોઈ વ્યક્તિ ફસાયેલી હોય તો તેને શોધી શકાય. આ ઘટનાએ યુદ્ધગ્રસ્ત લેબનોનની સ્થિતિને વધુ ગંભીર બનાવી દીધી છે.