ભારતમાં ૨૦૧૪ની ચૂંટણી વખતે ભાજપ દ્વારા દરેક નાગરિકના ખાતામાં ૧૫૦૦૦ રૂપિયા આપવાના જુમલા જેવો દાવો અમેરિકાના પ્રમુખ ટ્રમ્પે કરતા પ્રત્યેક નાગરિકને ૨૦૦૦ ડોલર ડિવિડન્ડ આપવની જાહેરાત કરી છે. યુએસ રાષ્ટ્રપતિ ડોનાલ્ડ ટ્રમ્પે વિશ્વભરના ઘણા દેશો પર ટેરિફ લાદી દીધા છે. હવે, તેમના નિર્ણયનો ખુદ યુનાઇટેડ સ્ટેટ્સમાં પણ વિરોધ થવા લાગ્યો છે. દરમિયાન, તેમણે ફરી એકવાર તેમની ટેરિફ નીતિનો બચાવ કર્યો છે. ટ્રમ્પે ટેરિફનો વિરોધ કરનારાઓને મૂર્ખ કહ્યા અને તેમણે દાવો કર્યો હતો કે ટેરિફને કારણે, યુનાઇટેડ સ્ટેટ્સ વિશ્વનો સૌથી ધનિક, સૌથી આદરણીય દેશ બન્યો છે, જ્યાં લગભગ કોઈ ફુગાવો નથી.

ટ્રમ્પએ બચાવ કર્યો છે કે ટેરિફમાંથી મળેલા પૈસામાંથી દરેકને ઓછામાં ઓછા 2,000 ડોલર પ્રતિ વ્યક્તિ ડિવિડન્ડ મળશે. તેમણે આ વાત તેમના સોશિયલ મીડિયા પ્લેટફોર્મ, ટ્રુથ પર પોસ્ટ કરી. ટ્રમ્પે પોતાની પોસ્ટમાં લખ્યું છે કે ટેરિફનો વિરોધ કરનારાઓ મૂર્ખ છે! તેમણે આગળ લખ્યું છે કે અમેરિકા વિશ્વનો સૌથી ધનિક, સૌથી આદરણીય દેશ બની ગયો છે, જ્યાં લગભગ કોઈ ફુગાવો નથી, અને શેરબજારના ભાવ રેકોર્ડ ઊંચાઈ પર છે. 401 લાખની બચત અત્યાર સુધીના સૌથી ઊંચા સ્તરે છે.

અમેરિકામાં રેકોર્ડ રોકાણ થયાનો ટ્રમ્પનો દાવો

ટ્રમ્પે વધુમાં જણાવ્યું હતું કે અમેરિકામાં હવે રેકોર્ડ રોકાણ થઈ રહ્યું છે. તેમની પોસ્ટમાં તેમણે લખ્યું છે કે પ્લાન્ટ અને ફેક્ટરીઓ દરેક જગ્યાએ ખુલી રહ્યા છે. તેમણે એમ પણ કહ્યું કે દરેક વ્યક્તિને પ્રતિ વ્યક્તિ ઓછામાં ઓછા 2,000 ડોલરનું ડિવિડન્ડ મળશે. જોકે, તેમણે પ્રસ્તાવિત ચુકવણી કેવી રીતે કરવામાં આવશે તે સ્પષ્ટ કર્યું નથી.