રાજકોટમાં કરોડોના ખર્ચે બનેલા રેલનગર બ્રિજમાં વગર વરસાદે પણ પાણી ભરાવવાની સમસ્યાને લઇને લોકો હેરાન થઈ રહ્યા હતા. ત્યારે હવે મહાનગરપાલિકા દ્વારા આ બ્રિજનું રીપેરીંગનું કામકાજ આજથી શરૂ કરવામાં આવ્યું છે. 

56 લાખના ખર્ચે બ્રિજમાં વોટર પ્રૂફિંગની કામગીરી કરવામાં આવશે. બે દિવસ અગાઉ આ કામગીરીને લઇને પોલીસ કમિશનર દ્વારા જાહેરનામું પણ બહાર પાડવામાં આવ્યું છે. જેમાં રેલનગર બ્રિજ બંધ રહેવાથી લોકો પોપટપરા અને માધાપર ચોકડી થઈને જઈ શકશે તેવું જણાવ્યું છે. 

આગામી બે મહિના સુધી આ કામગીરી ચાલુ રહેશે. જેને લઇને 2 લાખ જેટલા લોકોને અસર થશે. જોકે 56 લાખના ખર્ચે થતી રીનોવેશનની કામગીરીને લઇને લોકોને પાણી ભરાવવાની સમસ્યામાંથી કાયમી છુટકારો મળી જશે.