ગુજરાતમાં ચોમાસાની સિસ્ટમ પૂરજોશમાં સક્રિય થતાં આજે રાજ્યભરમાં મેઘરાજાએ તોફાની બેટિંગ કરી છે. સ્ટેટ ઇમરજન્સી ઓપરેશન સેન્ટર, ગાંધીનગર દ્વારા આજે સવારે 6થી સાંજે 6 વાગ્યા સુધીના 12 કલાક દરમિયાન જાહેર કરવામાં આવેલા વરસાદી આંકડા અનુસાર, રાજ્યના ૨૫૩ જેટલા તાલુકાઓમાં નોંધપાત્ર વરસાદ નોંધાયો છે. આજના દિવસમાં ખાસ કરીને ઉત્તર ગુજરાત, બનાસકાંઠા અને મધ્ય ગુજરાતના વિસ્તારોમાં વરસાદે રૌદ્ર સ્વરૂપ ધારણ કર્યું હતું.  

પાટણના સાંતલપુરમાં આભ ફાટ્યું: ૧૨ ઈંચથી વધુ વરસાદ

આજના વરસાદમાં સૌથી વધુ આફત પાટણ જિલ્લા પર તૂટી પડી છે. સાંતલપુર તાલુકામાં માત્ર ૧૨ કલાકના સમયગાળા દરમિયાન ૩૦૯ મિમી એટલે કે ૧૨.૧૭ ઈંચ જેટલો અતિભારે વરસાદ ખાબક્યો છે. સાંતલપુરમાં બપોરે 2થી 4 વાગ્યા વચ્ચે ૬૨ મિમી અને સાંજે 4 થી 6 વાગ્યા વચ્ચે ૮૨ મિમી વરસાદ પડતાં સમગ્ર વિસ્તાર જળમગ્ન બની ગયો હતો. આ ઉપરાંત, પાટણ જિલ્લાના રાધનપુરમાં ૨૩૫ મિમી (૯.૨૫ ઈંચ) વરસાદ નોંધાયો છે, જ્યાં બપોરે ૧૨:૦૦ થી ૧૪:૦૦ વચ્ચે જ ૯૩ મિમી વરસાદ પડ્યો હતો.  

વાવ-થરાદ, બનાસકાંઠા અને ખેડામાં તોફાની વરસાદ

વાવ-થરાદ અને બનાસકાંઠા જિલ્લામાં પણ મેઘરાજાએ મુશળધાર બોલાવી છે. વાવ-થરાદના ભાભરમાં ૧૮૦ મિમી (૭.૦૯ ઈંચ) અને દિયોદરમાં ૧૭૧ મિમી (૬.૭૩ ઈંચ) વરસાદ નોંધાયો છે. બનાસકાંઠા જિલ્લાના દાંતીવાડામાં સાંજના સમયે તોફાની વરસાદી સ્પેલ આવતાં ૧૭૪ મિમી (૬.૮૫ ઈંચ) વરસાદ ખાબક્યો છે, જેમાંથી માત્ર ૧૬:૦૦ થી ૧૮:૦૦ વાગ્યા સુધીમાં ૧૧૧ મિમી વરસાદ વરસ્યો હતો. મધ્ય ગુજરાતના ખેડા જિલ્લાના મહેમદાવાદમાં પણ ૧૭૦ મિમી (૬.૬૯ ઈંચ) અતિભારે વરસાદ નોંધાયો છે, જ્યાં સવારે ૬:૦૦ થી ૮:૦૦ વાગ્યાના ૨ કલાકમાં જ ૧૧૨ મિમી વરસાદ ખાબક્યો હતો.  

સુરેન્દ્રનગર અને મોરબી પંથકમાં જળબંબાકાર

સુરેન્દ્રનગરના થાનગઢમાં ૧૬૪ મિમી (૬.૪૬ ઈંચ) વરસાદ નોંધાયો છે. મોરબી જિલ્લાના વાંકાનેરમાં ૧૫૮ મિમી (૬.૨૨ ઈંચ) વરસાદ વરસતાં નીચાણવાળા વિસ્તારોમાં પાણી ફરી વળ્યા છે. ખેડા જિલ્લાના નડિયાદમાં ૧૩૮ મિમી (૫.૪૩ ઈંચ), અરવલ્લીના ધનસુરામાં ૧૧૪ મિમી (૪.૪૯ ઈંચ), મહેસાણાના ખેરાલુમાં ૧૧૩ મિમી (૪.૪૫ ઈંચ) અને બનાસકાંઠાના હડાદમાં ૧૧૩ મિમી (૪.૪૫ ઈંચ) વરસાદ નોંધાયો છે.  

અન્ય તાલુકાઓમાં ભારે વરસાદી માહોલ

રાજ્યના અન્ય મુખ્ય તાલુકાઓની વાત કરીએ તો, બનાસકાંઠાના ઓગડમાં ૧૦૮ મિમી (૪.૨૫ ઈંચ), ગાંધીનગરના દહેગામમાં ૧૦૭ મિમી (૪.૨૧ ઈંચ) અને મહીસાગરના વીરપુરમાં ૧૦૨ મિમી (૪.૦૨ ઈંચ) વરસાદ નોંધાયો છે. બનાસકાંઠાના ડીસામાં ૯૭ મિમી, મોરબીમાં ૯૬ મિમી, અમરેલીના લીલીયામાં ૯૩ મિમી અને કચ્છના રાપરમાં ૮૭ મિમી વરસાદ નોંધાયો છે. રાજ્યના ૪૩ થી વધુ તાલુકાઓમાં ૨ ઈંચથી વધુ અને ૮૦થી વધુ તાલુકાઓમાં ૧ ઈંચથી વધુ વરસાદ નોંધાતાં વહીવટી તંત્ર દ્વારા તમામ પૂરગ્રસ્ત વિસ્તારોમાં એલર્ટ જાહેર કરવામાં આવ્યું છે.