રાજકોટ-ચોટીલા નેશનલ હાઇવે પર એક મોટી દુર્ઘટના સર્જાતા સર્જાતા રહી ગઈ હતી. હાઇવે પર પૂરપાટ ઝડપે દોડી રહેલી ‘સુદામા ટ્રાવેલ્સ’ની એક લક્ઝરી બસમાં અચાનક જ ભીષણ આગ ફાટી નીકળી હતી. જોતજોતામાં આગે એટલું રૌદ્ર સ્વરૂપ ધારણ કરી લીધું હતું કે આખી બસ આગની ઝપેટમાં આવી ગઈ હતી અને હાઇવે પર ધુમાડાના કાળા ગોટેગોટા જોવા મળ્યા હતા.

મુસાફરોનો આબાદ બચાવ, મોટી જાનહાનિ ટળી

આગ લાગવાની આ ઘટના બનતાની સાથે જ ડ્રાઇવરે  ભારે સમયસૂચકતા વાપરી હતી. બસને તુરંત જ રોકી દેવામાં આવી હતી અને અંદર સવાર તમામ મુસાફરોને તાત્કાલિક સુરક્ષિત રીતે બહાર ઉતારી દેવાયા હતા. સદનસીબે આ ભયાનક ઘટનામાં કોઈ જાનહાનિ નોંધાઈ નથી. તમામ પ્રવાસીઓનો આબાદ બચાવ થતાં તંત્ર અને મુસાફરોએ રાહતનો શ્વાસ લીધો હતો, જોકે બસ સંપૂર્ણપણે બળીને ખાક થઈ ગઈ છે.

ઘટનાની જાણ થતાં જ સ્થાનિક પોલીસ અને ફાયરબ્રિગેડની ટીમ ઘટનાસ્થળે દોડી આવી હતી. ફાયરબ્રિગેડના જવાનોએ પાણીનો મારો ચલાવીને ભારે જહેમત બાદ આગ પર સંપૂર્ણ કાબૂ મેળવ્યો હતો.

હાઇવેની અધવચ્ચે બસમાં લાગેલી આગ અને ફાયર ફાઇટિંગના ઓપરેશનના કારણે નેશનલ હાઇવે પર થોડા સમય માટે ભારે ટ્રાફિકજામની સ્થિતિ સર્જાઈ હતી. પોલીસે ટ્રાફિક હળવો કરીને વાહનવ્યવહાર ફરી પૂર્વવત કરાવ્યો હતો અને આગ લાગવાના ચોક્કસ કારણો જાણવા માટે તપાસ શરૂ કરી છે.