કરદાતાઓ (Taxpayers) માટે ઇનકમ ટેક્સ રિટર્ન (ITR) ફાઇલ કરવા સંબંધિત અને વિદેશમાં નોકરી કરતા ભારતીય પ્રોફેશનલ્સ માટે અત્યંત મહત્વપૂર્ણ સમાચાર સામે આવ્યા છે. આવકવેરા વિભાગ દ્વારા ટેક્સ ચોરી કરનારા અને પોતાની સાચી કમાણી છુપાવનારા લોકો સામે કડક કાનૂની જોગવાઈઓ લાગુ કરવામાં આવી છે, જેમાં કરદાતાઓને બમણો એટલે કે ૨૦૦ ટકા સુધીનો ભારે દંડ થઈ શકે છે.

બીજી તરફ, ભારત સરકારે બ્રિટન (UK) જઈને નોકરી કરતા ભારતીય નાગરિકોને એક ઐતિહાસિક અને મોટી રાહત આપી છે. આગામી ૧૫ જુલાઈ ૨૦૨૬ થી ભારત અને યુકે વચ્ચે મુક્ત વ્યાપાર કરાર (FTA) અને ‘ડબલ કોન્ટ્રિબ્યુશન કન્વેન્શન’ (DCC) સત્તાવાર રીતે લાગુ થવા જઈ રહ્યું છે. ટેક્સના નવા નિયમો અને વિદેશ જતા ભારતીયોને થનારા આ મોટા આર્થિક ફાયદા અંગેનો સંપૂર્ણ વિગતવાર અહેવાલ નીચે મુજબ છે.

નાણાકીય બાબતોમાં કરવામાં આવેલી નાની સરખી બેદરકારી પણ તમારી જેબ પર ભારે પડી શકે છે. આવકવેરા કાયદા હેઠળ ટેક્સની ચોરી કરવી કે કમાણીની વિગતો છુપાવવી એ ગંભીર ગુનો માનવામાં આવે છે, જેના માટે આવકવેરા વિભાગે અલગ-અલગ કલમો હેઠળ આકરા દંડની જોગવાઈ કરી છે.

સાચી કમાણી છુપાવવા પર કેટલો દંડ થશે?
આવકવેરા અધિનિયમની કલમ 270A હેઠળ જો કોઈ કરદાતા પોતાની વાસ્તવિક આવક ઓછી દર્શાવે છે (અન્ડર-રિપોર્ટિંગ), તો તેણે છુપાવેલી આવક પર બનતા ટેક્સના ૫૦ ટકા રકમ દંડ તરીકે ચૂકવવી પડશે. આ ઉપરાંત, જો એવું સાબિત થાય કે કરદાતાએ જાણીજોઈને તથ્યો છુપાવ્યા છે, ખોટા દસ્તાવેજો કે બોગસ એન્ટ્રીઓ દર્શાવી છે (મિસ-રિપોર્ટિંગ), તો આ દંડની રકમ સીધી વધીને ટેક્સના ૨૦૦ ટકા (બે ગણી) થઈ જશે.

સમયસર આઈટીઆર (ITR) ન ભરવાના નુકસાન
અવારનવાર લોકો છેલ્લી તારીખ સુધી રિટર્ન ભરવાનું ટાળતા હોય છે, જે પાછળથી મોંઘું સાબિત થાય છે:

લેટ ફી: કલમ 234F મુજબ, નક્કી કરેલી અંતિમ તારીખ બાદ આઈટીઆર ફાઇલ કરવા પર ૫,૦૦૦ રૂપિયા સુધીની લેટ ફી ચૂકવવી પડે છે. જો કે, જે કરદાતાઓની વાર્ષિક કુલ આવક ૫ લાખ રૂપિયાથી ઓછી છે, તેમના માટે આ લેટ ફી ૧,૦૦૦ રૂપિયા સુધી મર્યાદિત રાખવામાં આવી છે.

દૈનિક દંડ: ટીડીએસ (TDS) કે ટીસીએસ (TCS) સ્ટેટમેન્ટ મોડું જમા કરાવવા બદલ કલમ 234E હેઠળ રોજનો ૨૦૦ રૂપિયા દંડ થાય છે.

એકાઉન્ટ બુક અને ઓડિટ: જરૂરી ખાતાઓ કે બહીખાતા મેઇન્ટેન ન કરવા બદલ કલમ 271A હેઠળ ૨૫,૦૦૦ રૂપિયાની પેનલ્ટી થઈ શકે છે. જ્યારે નિયમ મુજબ ઓડિટ ન કરાવવાની સ્થિતિમાં બિઝનેસ ટર્નઓવરના ૦.૫ ટકા અથવા મહત્તમ ૧.૫ લાખ રૂપિયા સુધીનો દંડ થઈ શકે છે.

બ્રિટન (UK) જતાં ભારતીય પ્રોફેશનલ્સને મળી મોટી રાહત
એક તરફ જ્યાં દેશમાં ટેક્સના નિયમો કડક કરાયા છે, ત્યાં બીજી તરફ કેન્દ્રીય વાણિજ્ય અને ઉદ્યોગ મંત્રી પીયૂષ ગોયલે વિદેશમાં નોકરી કરતા ભારતીયો માટે એક શાનદાર જાહેરાત કરી છે. અત્યાર સુધી જ્યારે કોઈ ભારતીય પ્રોફેશનલ ૨ થી ૫ વર્ષના ટૂંકા ગાળાના અસાઇનમેન્ટ માટે બ્રિટન નોકરી કરવા જતો, ત્યારે તેની સેલરીનો આશરે ૨૫ ટકા જેટલો મોટો હિસ્સો ત્યાંના નેશનલ ઇન્શ્યોરન્સ કોન્ટ્રિબ્યુશન (NIC) માં કપાત થઈ જતો હતો. બ્રિટનના નિયમ મુજબ ત્યાં પેન્શનનો લાભ લેવા માટે ઓછામાં ઓછું ૧૦ વર્ષ રહેવું ફરજિયાત છે, જેના કારણે ટૂંકા ગાળા માટે જતા ભારતીયોના આ લાખો રૂપિયા ભવિષ્યમાં ડૂબી જતા હતા અને તેનો કોઈ લાભ મળતો નહોતો.

હવે બ્રિટનમાં કપાતા પૈસા સીધા ભારતના PF ખાતામાં જમા થશે
નવા ભારત-યુકે કરાર (DCC) ના અમલીકરણ બાદ આખી વ્યવસ્થા બદલાઈ જશે. હવે જે ભારતીયો ૫ વર્ષ સુધીના ટૂંકા ગાળા માટે બ્રિટન જશે, તેમની સેલરીમાંથી કપાતો એ ૨૫ ટકા હિસ્સો બ્રિટન સરકાર પાસે જમા નહીં થાય. તેના બદલે, એ તમામ નાણાં સીધા ભારતમાં રહેલા તેમના પ્રોવિડન્ટ ફંડ (PF) ખાતામાં ટ્રાન્સફર કરી દેવામાં આવશે.

આ જમા રકમ પર કર્મચારીઓને ભારત સરકાર દ્વારા નક્કી કરાયેલો વાર્ષિક ૮.૨૫ ટકાનો શાનદાર અને ટેક્સ-ફ્રી વ્યાજ દર પણ મળતો રહેશે. સરકારના આ ઐતિહાસિક પગલાથી વિદેશમાં કામ કરતા ભારતીયોની ચોખ્ખી બચત અને કમાણીમાં મોટો વધારો થશે, સાથે જ તેમના નિવૃત્તિના સમય (Retirement) માટે એક મોટું ફંડ પણ તૈયાર થશે.