ગઈકાલે સાંજે અમદાવાદ એરપોર્ટ પર એક મોટી દુર્ઘટના ટળી હતી. ટેક્સીવે પર એર ઇન્ડિયા અને ઇન્ડિગોના બે વિમાનો સામસામે આવી ગયા હતા. મુંબઈથી અમદાવાદ રાત્રે લગભગ આઠ વાગ્યે પહોંચેલી એર ઇન્ડિયાની ફ્લાઇટ એઆઈ2493ને 34એલ સ્ટેન્ડ પર આગળ વધવાની સૂચના આપવામાં આવી હતી, પરંતુ ટેક્સી કરતી વખતે તેણે ભૂલથી ખોટો વળાંક લીધો હતો.

આના કારણે એર ઇન્ડિયાનું વિમાન અમદાવાદ-મુંબઈ ઇન્ડિગો ફ્લાઇટના માર્ગમાં આવી ગયું હતું. જોકે, બંને વિમાનો વચ્ચે પૂરતું અંતર રહ્યું હતું, જેના કારણે અથડામણ ટળી હતી. ઇન્ડિગોના વિમાનને રોકીને પરિસ્થિતિનો ઉકેલ લાવવામાં આવ્યો, જ્યારે એર ઇન્ડિયાના વિમાનને પાછળથી પાર્કિંગમાં ખેંચી લેવામાં આવ્યું હતું.

એર ઇન્ડિયાએ ભૂલ સ્વીકારી છે પરંતુ સ્પષ્ટતા કરી છે કે મુસાફરો અને ક્રૂની સલામતીને કોઈ અસર થઈ નથી. ઇન્ડિગોએ એક નિવેદનમાં એમ પણ કહ્યું હતું કે બીજી એરલાઇનનું વિમાન ખોટો વળાંક લઈને તેમના માર્ગમાં આવી ગયું હતું, પરંતુ બંને વિમાનો સલામત અંતરે અટકી ગયા હતા અને એક વિમાનને પાછળથી દૂર લઈ જવામાં આવ્યું હતું. અધિકારીઓને ઘટનાની જાણ કરવામાં આવી છે અને તપાસ ચાલી રહી છે.

એટીસીને આ બાબતની જાણ થતા એરપોર્ટનો સ્ટાફ રન વે પર પહોંચી ગયો હતો અને એર ઈન્ડિયાના વિમાનને પાર્કિગ તરફ લઈ જવાયું અને ત્યારબાદ ઈન્ડિગોનું વિમાન રન વે પર પહોંચ્યું હતુ.

એર ઇન્ડિયાએ એક નિવેદન બહાર પાડીને જણાવ્યું હતું કે 24 જૂને મુંબઈથી અમદાવાદ પહોંચેલી ફ્લાઇટ એઆઇ-2493 લેન્ડિંગ પછી ટેક્સીંગ દરમિયાન અજાણતા ખોટી દિશામાં વળી ગઈ હતી. એર ઇન્ડિયાએ જણાવ્યું કે ઘટનાની જાણકારી વિમાનન નિયમનકારી અધિકારીઓને આપી દેવામાં આવી છે અને મામલાની તપાસ શરૂ કરી દેવામાં આવી છે.