વડોદરા મહાનગરપાલિકા અને પૂર્વ ક્રિકેટર તેમજ ટીએમસી સાંસદ યુસુફ પઠાણ વચ્ચેનો જમીન વિવાદ હાલ હાઈકોર્ટમાં ચાલી રહ્યો છે. ગુજરાત હાઈકોર્ટે આ કેસમાં યુસુફ પઠાણને વધુ  ચાર અઠવાડિયાનો સમય આપ્યો છે. જમીન ખાલસા કરવાના સિંગલ જજના ચુકાદા બાદ યુસુફે ડબલ જજની બેન્ચ સમક્ષ અપીલ કરી છે. આ અપીલ અંતર્ગત આજે યુસુફ પઠાણ દ્વારા સિવિલ એપ્લિકેશન દાખલ કરી કોર્ટ પાસે સમય માંગવામાં આવ્યો હતો. સુનાવણી દરમિયાન કોર્ટે સમય આપતા ટકોર કરી હતી કે, અમે તમને સમય આપીએ છીએ, પરંતુ જેટલું તમે મોડું કરશો એટલો દંડ વધુ થશે, કારણ કે વર્ષ 2014થી જમીન ઉપર તમારો અનધિકૃત કબ્જો છે.

યુસુફ પઠાણ વતી કોર્ટમાં એવી દલીલ કરવામાં આવી હતી કે તેઓ આંતરરાષ્ટ્રીય ક્રિકેટરોને જમીન ફાળવણી કરવા અંગેની સરકારની સત્તાવાર પોલિસી કોર્ટ સમક્ષ રજૂ કરવા માંગે છે. આ મહત્વપૂર્ણ દસ્તાવેજો અને નીતિઓ એકત્રિત કરવા તથા તેને કોર્ટ રેકોર્ડ પર લાવવા માટે તેમને વચગાળાના સમયની જરૂર છે. હાઈકોર્ટની ડબલ જજની બેન્ચે આ દલીલને ગ્રાહ્ય રાખીને તેમને ચાર અઠવાડિયાની મહોલત આપી છે, પરંતુ સાથે જ કડક શબ્દોમાં એ પણ સ્પષ્ટ કર્યું છે કે વર્ષ 2014થી ચાલી રહેલા આ કથિત અનધિકૃત કબ્જા બદલ વિલંબના પ્રમાણમાં દંડની રકમ પણ વધી શકે છે.

આ જમીન વિવાદના ઈતિહાસ પર નજર કરીએ તો, વર્ષ 2012માં યુસુફ પઠાણ દ્વારા વડોદરાના તાંદલજા વિસ્તારમાં આવેલી જમીન મેળવવા માટે મ્યુનિસિપલ કોર્પોરેશનમાં અરજી કરવામાં આવી હતી. વડોદરાના તાંદલજા સ્થિત શુભમ પાર્ટી પ્લોટ પાસે આવેલી આ આશરે 978 ચોરસ મીટરની કિંમતી જમીન માટે વડોદરા મનપાની સ્ટેન્ડિંગ કમિટીએ રિઝોલ્યુશન પસાર કરીને તે સમયની માર્કેટ કિંમતે જમીન આપવાનો પ્રસ્તાવ કર્યો હતો. વડોદરા મહાનગરપાલિકાની સામાન્ય સભાએ પણ આ પ્રસ્તાવને લીલી ઝંડી આપી દીધી હતી અને અંતિમ મંજૂરી માટે ફાઈલ રાજ્ય સરકાર પાસે મોકલવામાં આવી હતી.

વડોદરા કોર્પોરેશન દ્વારા યુસુફ પઠાણને જમીન ફાળવવાના આ પ્રસ્તાવને રાજ્ય સરકારે વર્ષ 2014માં જ રદ કરી દીધો હતો. તેમ છતાં, વર્ષ 2014થી લઈને વર્ષ 2026 સુધી આ જમીન યુસુફ પઠાણના કબ્જા હેઠળ રહી છે. વિવાદિત પ્લોટ પર કથિત રીતે બાઉન્ડ્રી વોલ (સરહદની દીવાલ) અને પશુઓ માટે શેડ બનાવી દેવામાં આવ્યો હતો. તાજેતરમાં વડોદરા મ્યુનિસિપલ કોર્પોરેશન દ્વારા ગત છઠ્ઠી જૂન, 2024ના રોજ એક કડક આદેશ જાહેર કરવામાં આવ્યો હતો. આ આદેશમાં વડોદરા મહાનગરપાલિકાએ જાહેર હરાજી વિના 99 વર્ષના લીઝ પર પ્લોટ ફાળવવાનો પ્રસ્તાવ સત્તાવાર રીતે નકારી કાઢ્યો હતો અને પ્લોટ પર થયેલું તમામ દબાણ તાત્કાલિક અસરથી દૂર કરવા સૂચના આપી હતી.

કોર્પોરેશનની આ નોટિસ અને વર્ષ 2014ના રાજ્ય સરકારના આદેશને પડકારતા યુસુફ પઠાણે વર્ષ 2024માં ગુજરાત હાઈકોર્ટના દ્વાર ખટખટાવ્યા હતા. હાઈકોર્ટના સિંગલ જજે આ મામલે જમીન ખાલસા કરવાનો એટલે કે સરકાર હસ્તક લેવાનો ચુકાદો આપ્યો હતો. સિંગલ જજના આ આકરા નિર્ણય સામે યુસુફ પઠાણે હાઈકોર્ટની ડબલ જજની બેન્ચ સમક્ષ અપીલ (ડિવિઝન બેન્ચ) દાખલ કરી છે. હાલ આ કેસમાં કાયદાકીય લડત ચાલી રહી છે અને આગામી દિવસોમાં સરકારની સ્પોર્ટ્સ પર્સન પોલિસી આ કેસમાં કેટલો વળાંક લાવે છે તેના પર સૌની નજર રહેશે.