હવામાન ખાતાના જણાવ્યા મુજબ મહત્તમ તાપમાનનો પારો ધીમે ધીમે આગળ વધી રહ્યો છે. પરંતુ શનિવારથી તેમાં ચાર ડિગ્રી સુધીનો વધારો થશે અને રાજ્યના અનેક શહેરોમાં મહતમ તાપમાન ૪૦ ડિગ્રી આસપાસ થઈ જશે. આગામી ચાર-પાંચ દિવસ સુધી ગુજરાત સહિત દેશના કોઈ રાજ્યમાં હિટવેવની શક્યતા નથી. પરંતુ ગુજરાતના દરિયાકાંઠાના વિસ્તારોમાં ઊંચું તાપમાન અને ભેજવાળા વાતાવરણના કારણે આગામી તારીખ 22 અને 23 ના રોજ બફારો અને અકળામણ વધી જશે. આજે ગુજરાતના દરિયાકાંઠા જેવી જ સ્થિતિ તામિલનાડુ, પુડીચેરી અને કર્ણાટકમાં જોવા મળી છે.

દરિયાકાંઠાના વિસ્તારોમાં આજે સવારે ઝાકળ જોવા મળી હતી. ભુજ, દમણ, દ્વારકા, કંડલા, ઓખા અને પોરબંદરમાં સવારે વાતાવરણમાં ભેજનું પ્રમાણ વધી ગયું હતું અને વાહનો પર તથા વૃક્ષો પર ઝાકળ જામેલી જોવા મળી હતી. રસ્તાઓ પણ ભીના થયા હતા. દરિયાકાંઠે ન આવતું હોવા છતાં રાજકોટ શહેરમાં પણ આજે સવારે ઝાકળ જોવા મળી હતી.

આજે સવારે ભુજમાં 84, દ્વારકામાં 80, કંડલામાં 81, ઓખામાં 82, પોરબંદરમાં 73, રાજકોટમાં 83 અને દમણમાં 80 ટકા પેજ નોંધાયો છે. રાજ્યના અન્ય વિસ્તારોમાં ભેજનું પ્રમાણ સવારે ૪૦ થી ૪૫ ટકા આસપાસ રહ્યું હતું.

ભેજના પ્રમાણમાં વધારાની સાથોસાથ દરિયાકાંઠાના વિસ્તારોમાં ગરમીનું પ્રમાણ પણ વધી ગયું છે. બુધવારે સમગ્ર રાજ્યમાં સૌથી ઊંચું તાપમાન મહુવામાં 38.2 ડિગ્રી નોંધાયું હતું. ભુજમાં 36.2, કંડલામાં 35.2, પોરબંદરમાં 35.2 ડિગ્રી મહત્તમ તાપમાન રહ્યું હતું. ડીસામાં ગઈકાલે મહત્તમ તાપમાન 38.1, રાજકોટમાં ૩૭.૭, સુરેન્દ્રનગરમાં 37.3, અમદાવાદમાં 37.5, ગાંધીનગરમાં 37.4, વડોદરામાં 37 ડીગ્રી મહત્તમ તાપમાન નોંધાયું છે.