પેટ્રોલિયમ મંત્રાલયના સંયુક્ત સચિવ સુજાતા શર્માએ ખાતરી આપી છે કે દેશમાં કાચા તેલ (Crude Oil) નો પૂરતો ભંડાર છે. તેમણે સ્પષ્ટ કર્યું કે ઘરેલું ગ્રાહકોને એલપીજીનો પુરવઠો પ્રાધાન્યના ધોરણે પૂરો પાડવામાં આવી રહ્યો છે અને હાલમાં ક્યાંય પણ અછતની સ્થિતિ નથી.

LPG સપ્લાય અને ઓનલાઈન બુકિંગનો ટ્રેન્ડ
સરકારના જણાવ્યા અનુસાર, દેશભરમાં ગેસ સિલિન્ડરનું વિતરણ સુચારૂ રીતે ચાલી રહ્યું છે. તાજેતરમાં એક જ દિવસમાં આશરે 50 લાખ સિલિન્ડરનું બુકિંગ નોંધાયું હતું, જેની સામે ડિલિવરી રેટ 93% રહ્યો છે. હવે 98% બુકિંગ ઓનલાઈન માધ્યમથી થઈ રહ્યું છે, જેના કારણે પ્રક્રિયામાં પારદર્શિતા આવી છે. વધતી જતી ગરમીને કારણે બુકિંગમાં થોડો ઘટાડો જોવા મળ્યો છે અને હાલમાં રોજનું બુકિંગ 45-46 લાખ સિલિન્ડરની આસપાસ છે.

નવા PNG કનેક્શન અને બેદરકાર ડિસ્ટ્રિબ્યુટર્સ પર કડક કાર્યવાહી
માર્ચ 2026 થી અત્યાર સુધીમાં દેશમાં આશરે 4.68 લાખ નવા PNG (પાઇપ્ડ નેચરલ ગેસ) કનેક્શન આપવામાં આવ્યા છે. તે જ સમયે ગ્રાહકોને હેરાન કરતા કે નિયમોનું ઉલ્લંઘન કરતા વિતરકો સામે પણ કડક પગલાં લેવાયા છે:

- 255 એલપીજી ડિસ્ટ્રિબ્યુટર્સ પર દંડ ફટકારવામાં આવ્યો છે.
- 55 ડિસ્ટ્રિબ્યુટર્સને સસ્પેન્ડ કરવામાં આવ્યા છે.
- નાના ગ્રાહકો માટે 23 માર્ચથી અત્યાર સુધીમાં 16.5 લાખથી વધુ (5 કિલોના) સિલિન્ડર વેચાયા છે.

બંદરો અને સપ્લાય ચેઈન પર અપડેટ
શિપિંગ મંત્રાલયના જણાવ્યા અનુસાર દેશના તમામ બંદરો સામાન્ય રીતે કાર્યરત છે. ક્યાંય પણ જહાજોની ભીડ (Congestion) નથી, જેના કારણે વિદેશથી આવતા ક્રૂડ ઓઈલ કે અન્ય જીવનજરૂરી ચીજવસ્તુઓના પુરવઠા પર કોઈ અસર પડી નથી.

આંતરરાષ્ટ્રીય ફ્લાઇટ્સ અને ભારતીયોની વાપસી
વિદેશ મંત્રાલયના અધિક સચિવ અસીમ આર. મહાજને જણાવ્યું કે 28 ફેબ્રુઆરીથી અત્યાર સુધીમાં આશરે 10.38 લાખ મુસાફરો ભારત પરત ફર્યા છે. ભારત અને યુએઈ વચ્ચે આશરે 100 ફ્લાઇટ્સ કાર્યરત થવાની અપેક્ષા છે. સાઉદી અરેબિયા, ઓમાન અને કુવૈતથી નિયમિત ફ્લાઇટ્સ ચાલુ છે. કતારનું હવાઈ ક્ષેત્ર આંશિક રીતે ખુલ્લું છે અને બહેરીનથી પણ ટૂંક સમયમાં મર્યાદિત ફ્લાઇટ્સ શરૂ કરવાનું આયોજન છે.

​​​​​​​સરકારે જનતાને અપીલ કરી છે કે તેઓ અફવાઓથી દૂર રહે. એલપીજી, ક્રૂડ ઓઈલ અને ટ્રાન્સપોર્ટેશનની સ્થિતિ સંપૂર્ણપણે નિયંત્રણમાં છે અને સામાન્ય નાગરિકોને કોઈ પણ પ્રકારની અસુવિધા થશે નહીં.