ઉપલેટાના ડુંગળીના વેપારી સાથે પ.બંગાળના શખસે ઉધારમાં માલ મંગાવી પેમેન્ટ ન કરી રૂ.૭.૯૯ લાખની છેતરપિંડી કરી હોવા અંગેની ફરિયાદ ભાયાવદર પોલીસ સ્ટેશનમાં નોંધાવવામાં આવી છે.પોલીસે ફરિયાદ પરથી ગુનો નોંધી બંગાળના વેપારીને ઝડપી લેવા તપાસ હાથ ધરી છે.
​​​​​​​
બનાવની જાણવા મળતી વિગતો મુજબ,ઉપલેટા તાલુકાના સેવંત્રા ગામે રહેતા ગોવિંદભાઇ નથુભાઇ બારીયા(ઉ.વ ૩૯) નામના આહિર વેપારીએ ભાયાવદર પોલીસ સ્ટેશનમાં નોંધાવેલી ફરિયાદમાં આરોપી તરીકે પ.બંગાળના બસીરહટ શહેરના પપઇ એન્ટરપ્રાઇઝના પ્રોપરાઇટર પપઇભાઇનું નામ આપ્યું છે.જેના આધારે પોલીસે આરોપી સામે આઇપીસીની કલમ ૪૦૬,૪૨૦ મુજબ ગુનો નોંધી જરૂરી કાર્યવાહી કરી હતી.
વેપારીએ પોતાની ફરિયાદમાં જણાવ્યા મુજબ,તેમની ઉપલેટા ખાતે આવેલી સતનામ ટ્રેડીંગ પેઢી પર વર્ષ ૨૦૨૨ ના સેવંત્રા ગામે આરોપી રાજકોટના વેપારીના પરિચય થકી ફરિયાદી પાસે આવ્યા હતાં અને તેણે પોતે ડુંગળીનો હોલસેલ વેપાર કરતો હોય તેમ જણાવ્યું હતું.બાદમાં ડુંગળીની ખરીદી કરવાની તેમ કહી તા. ૨૮/૮/૨૦૨૨ થી તા.૭/૯/૨૦૨૨ દરમિયાન કુલ રૂ.૪૯,૬૯,૩૬૮ ની ડુંગળી સતનામ ટ્રેડીંગમાંથી ઉધારમાં મંગાવ્યો હતો.જેમાં આરોપીએ કટકે કટકે કરી કુલ રૂ.૪૧,૬૯,૬૮૮ ચૂકવી દીધા હતાં જયારે બાકી નિકળતી રૂ.૭,૯૯,૬૮૦ ની રકમ ચૂકવી ન હતી.વેપારીએ આ રકમની માંગણી કરતા આરોપી બહાના આપતો હતો.અંતે પોતાની સાથે છેતરપિંડી થઇ હોવાનો અહેસાસ થતા વેપારીએ આ અંગે ભાયાવદર પોલીસ મથકમાં આ ફરિયાદ નોંધાવી હતી.જેના આધારે પોલીસે ગુનો નોંધી જરૂરી કાર્યવાહી કરી હતી.