અમરેલી જિલ્લામાં ગઈકાલે દેશીદારૂનું વેચાણ કરતા 40 જગ્યાએ દરોડા પાડી કુલ 251 લીટર દેશી દારૂ અને 80 લીટર આથો તેમજ દારૂ બનાવવાની વસ્તુઓ, કેરબા સહીત 40 હજારથી વધુનો મુદામાલ કબ્જે કરી 16 મહિલાઓ સહીત 40 સામે પોલીસે ગુનો નોંધ્યો છે.

અમરેલી જિલ્લામાં દેશી-વિદેશી દારૂના દુષણને દૂર કરવાની સાથે દારૂનું વેચાણ કરતા શખ્સો સામે કાર્યવાહી કરી સફળ રેઇડ કરવા જિલ્લા પોલીસ વડા સંજય ખરાતની સુચનાને પગલે અમરેલી જિલ્લાના લાઠી, રાજુલા, સાવરકુંડલા, વંડા, જાફરાબાદ, નાગેશ્રી, મરીન પીપાવાવ, વડિયા, લીલીયા, ખાંભા, ધારી, બગસરા, બાબરા, રાજુલા, દામનગર, અમરેલી સીટી અને તાલુકા પોલીસ સ્ટેશન વિસ્તારમાં ઠેક ઠેકાણે દારૂના દરોડા પાડવામાં આવ્યા હતા. કુલ 40 જેટલા દરોડામાં 251 લીટર દેશી દારૂ મળી આવ્યો હતો જયારે 80 લીટર દારૂ બનાવવાનો આથો અને કેરબા સહિતની ચીજવસ્તુઓ મળી આવતા કુલ રૂ.40 હજારથી વધુનો મુદામાલ કબ્જે કરી 16 મહિલા સહીત 40 શખ્સો સામે ગુનો નોંધી કાર્યવાહી કરી હતી.