ભારત અને ન્યુઝીલેન્ડ વચ્ચે રમાઈ રહેલી ત્રણ મેચની ટેસ્ટ સીરીઝની બીજી મેચ મહારાષ્ટ્રના પુણે ક્રિકેટ સ્ટેડિયમમાં રમાઈ રહી છે, જેમાં ન્યુઝીલેન્ડની ટીમે ટોસ જીતીને પ્રથમ બેટીંગ કરવાનો નિર્ણય લીધો છે. આ મેચ માટે ભારતીય ટીમના પ્લેઈંગ 11માં 3 ફેરફાર કરવામાં આવ્યા છે, જેમાં શુભમન ગિલ, આકાશ દીપ અને વોશિંગ્ટન સુંદરની વાપસી થઈ છે, જ્યારે કેએલ રાહુલ, મોહમ્મદ સિરાજ અને કુલદીપ યાદવને બહાર કરવામાં આવ્યા છે. ન્યૂઝીલેન્ડની ટીમમાં પણ એક ફેરફાર કરવામાં આવ્યો છે.

વર્ષ 2021માં રમી હતી વોશિંગ્ટન સુંદરે તેની છેલ્લી મેચ

ન્યુઝીલેન્ડ સામેની પુણે ટેસ્ટ મેચ માટે ટીમ ઈન્ડિયામાં જોવા મળેલા ત્રણ મોટા ફેરફારોમાં વોશિંગ્ટન સુંદર પ્લેઈંગ 11માં પ્રવેશતા જોવા મળી રહ્યા છે, જેણે માર્ચ 2021માં ઈંગ્લેન્ડ સામેની ટેસ્ટ શ્રેણી દરમિયાન પોતાની છેલ્લી ટેસ્ટ મેચ રમી હતી. આ પછી લગભગ 4 વર્ષ પછી, સુંદર ટેસ્ટ ટીમના પ્લેઇંગ 11માં પરત ફર્યો છે. વોશિંગ્ટન સુંદરે અત્યાર સુધી રમાયેલી 4 ટેસ્ટ મેચોની 6 ઇનિંગ્સમાં બેટિંગ કરતા 66.25ની એવરેજથી 265 રન બનાવ્યા છે, જેમાં ત્રણ અડધી સદીનો પણ સમાવેશ થાય છે. બોલિંગમાં તેણે અત્યાર સુધી 49.83ની એવરેજથી 6 વિકેટ ઝડપી છે.

ન્યુઝીલેન્ડની ટીમમાં પણ એક ફેરફાર

ન્યુઝીલેન્ડની ટીમે પુણે ટેસ્ટ મેચ માટે તેના પ્લેઈંગ 11માં પણ ફેરફાર કર્યો છે, જેમાં છેલ્લી મેચમાં ટીમ માટે સૌથી વધુ વિકેટ લેનાર ઝડપી બોલર મેટ હેનરી સંપૂર્ણ રીતે ફીટ ન હોવાને કારણે આ મેચમાં રમ્યો ન હતો. આ માહિતી ટીમના કેપ્ટન ટોમ લાથમે આપી હતી જેમાં તેના સ્થાને મિશેલ સેન્ટનરનો સમાવેશ કરવામાં આવ્યો છે.

બીજી ટેસ્ટ મેચ માટે બંને ટીમોની પ્લેઈંગ 11

ભારત - રોહિત શર્મા (કેપ્ટન), યશસ્વી જયસ્વાલ, શુભમન ગિલ, વિરાટ કોહલી, સરફરાઝ ખાન, ઋષભ પંત (વિકેટકીપર), રવિન્દ્ર જાડેજા, રવિચંદ્રન અશ્વિન, વોશિંગ્ટન સુંદર, જસપ્રિત બુમરાહ, આકાશ દીપ.

ન્યુઝીલેન્ડ - ટોમ લાથમ (કેપ્ટન), ડેવોન કોનવે, વિલ યંગ, રચિન રવિન્દ્ર, ડેરીલ મિશેલ, ટોમ બ્લંડેલ (વિકેટમાં), ગ્લેન ફિલિપ્સ, મિશેલ સેન્ટનર, ટિમ સાઉથી, એજાઝ પટેલ, વિલિયમ ઓ'રર્કે.