ત્રણ ભારતીયો સહિત ૨૭૪ પર્વતારોહકોએ નેપાળ બાજુથી એક જ દિવસમાં માઉન્ટ એવરેસ્ટ પર ચઢીને વિશ્વ વિક્રમ સ્થાપ્યો છે. બુધવારે બધા ૨૭૪ પર્વતારોહકો ૮,૮૪૮.૮૬ મીટર ઊંચા શિખર પર પહોંચ્યા હતા.

આ રેકોર્ડ બનાવનારી ટીમમાં ત્રણ ભારતીય પર્વતારોહકો તુલસી રેડ્ડી પાલપુનુરી, સંદીપ આરે અને અજય પાલ સિંહ ધાલીવાલ છે. નેપાળ બાજુથી એક જ દિવસમાં સૌથી વધુ સંખ્યામાં પર્વતારોહકોએ માઉન્ટ એવરેસ્ટ પર ચઢવાનો અગાઉનો રેકોર્ડ ૨૦૧૯માં સ્થાપિત થયો હતો. મે ૨૦૧૯માં, નેપાળ બાજુથી એક જ દિવસમાં ૨૨૩ પર્વતારોહકો શિખર પર પહોંચ્યા હતા. નેપાળમાં એક્સપિડિશન કંડક્ટર્સ એસોસિએશનના જનરલ સેક્રેટરી ઋષિ રામ ભંડારીએ જણાવ્યું હતું કે ૧૫૦ નેપાળી શેરપા સહિત આ પર્વતારોહકો એક જ દિવસમાં શિખર પર પહોંચ્યા હતા.

નેપાળની કામી રીતા શેરપાએ પણ એક નવો રેકોર્ડ બનાવ્યો છે. તેમણે 32મી વખત માઉન્ટ એવરેસ્ટના શિખર પર પહોંચીને પોતાનો જ રેકોર્ડ તોડ્યો, જ્યારે નેપાળની લક્પા શેરપા 11મી વખત માઉન્ટ એવરેસ્ટ પર ચઢાણ કરનારી પ્રથમ મહિલા બની છે. પુણેના ગિરિપ્રેમી પર્વતારોહણ ક્લબના ત્રણ સભ્યોએ એવરેસ્ટ પર ચઢાણ કર્યું હતું. પુણેના ગિરિપ્રેમી પર્વતારોહણ ક્લબના ત્રણ પર્વતારોહકોએ ગુરુવારે માઉન્ટ એવરેસ્ટ પર ચઢાણ પૂર્ણ કર્યું અને 8,848.86 મીટરની ઊંચાઈએ ભારતીય ત્રિરંગો લહેરાવ્યો હતો.

આ અભિયાનનું નેતૃત્વ કરનાર ઉમેશ ઝિર્પેએ જણાવ્યું હતું કે વિવેક શિવડે, મિહિર જાધવ અને અખિલ કાટકર 21 મેના રોજ તેમના માર્ગદર્શકો ઉર્ગેન શેરપા, લક્પા શેરપા અને લક્પા તેનજી શેરપા સાથે વિશ્વના સૌથી ઊંચા શિખરના શિખર પર પહોંચ્યા હતા. ભારતના લક્ષ્મીકાંત મંડલે પણ ગુરુવારે વિશ્વના સૌથી ઊંચા શિખર પર ચઢાણ કર્યું હતું. મંડલે છ નેપાળી શેરપા સહિત આઠ અન્ય લોકો સાથે એવરેસ્ટ પર ચઢાણ કર્યું હતું.