અમદાવાદના આત્રેય ઓર્ચિડ એપાર્ટમેન્ટમાં આજે ભીષણ આગ લાગી હતી, જેના કારણે નાસભાગ મચી ગઈ હતી. આગની ગંભીરતાને જોતા, પાંચમા માળે ફસાયેલી એક યુવતીએ પોતાનો જીવ બચાવવા માટે નીચે કૂદવાનો નિર્ણય કર્યો હતો. સદ્નસીબે નીચે ઉભેલા લોકોએ ત્વરિત પ્રતિક્રિયા આપીને તેને ઝીલી લીધી હતી, જેના કારણે તેનો જીવ બચી ગયો હતો.

આ ઘટનામાં પાંચ લોકોને ધુમાડાની અસર થવાને કારણે હોસ્પિટલમાં ખસેડવામાં આવ્યા છે, જ્યારે ફાયર બ્રિગેડની ટીમે ભારે જહેમત બાદ 27 જેટલા લોકોને સુરક્ષિત રીતે બહાર કાઢ્યા હતા. 

એસીના આઉટરમાં આગ લાગી હતી

D વિંગમાં 404 નંબરના એસીના આઉટરમાં આગ લાગવાની ઘટના બની હતી. ફાયર બ્રિગેડ દ્વારા ફ્લેટમાં રહેલા એક સિનિયર સિટીઝનને તાત્કાલિક નીચે ઉતારવામાં આવ્યા હતા. બાકીના લોકોએ ફ્લેટમાંથી નીચે ઉતારવા માટેના પ્રયત્નો કર્યા હતા.

ફાયર બ્રિગેડની અનેક ગાડીઓ ઘટનાસ્થળે પહોંચી ગઈ હતી અને કલાકોની જહેમત બાદ આગ પર કાબૂ મેળવવામાં આવ્યો હતો. પોલીસ પણ ઘટનાસ્થળે હાજર છે અને આગ લાગવાના કારણોની તપાસ કરી રહી છે. આ ઘટનાએ એપાર્ટમેન્ટમાં રહેતા લોકોમાં ભારે ગભરાટ ફેલાવી દીધો હતો.