રાજસ્થાનમાં ચુંટણીના સમાચારો વચ્ચે એક હાઈપ્રોફાઈલ મર્ડરની ઘટના બની છે. જયપુરમાં અજાણ્યા શખ્શોએ શ્રી રાષ્ટ્રીય રાજપૂત કરણી સેનાના રાષ્ટ્રીય અધ્યક્ષ સુખદેવ સિંહ ગોગામેડીની ગોળી મારીને હત્યા નીપજાવી છે. અહેવાલો મુજબ આરોપીઓએ સુખદેવ સિંહના ગનરને પણ ગોળી મારી છે.


ઘટના બાદ બંનેને તાત્કાલિક હોસ્પિટલમાં દાખલ કરવામાં આવ્યા હતા, જ્યાં તબીબોએ સુખદેવસિંહ ગોગામેડીને મૃત જાહેર કર્યા હતા. ઘટનાને અંજામ આપીને અજાણ્યા શખ્શો ફરાર થઈ ગયા હતા. હાલ શ્યામ નગર પોલીસ સ્ટેશનની પોલીસ ઘટના સ્થળે પહોંચી ગઈ છે.

આ ઘટના શ્યામ નગરમાં બની હતી. મળતી માહિતી મુજબ, સુખદેવ સિંહ ગોગામેડી પોતાના ઘરે હતા ત્યારે અજાણ્યા બદમાશોએ ઘરમાં ઘૂસીને ગોળી મારી દીધી હતી. આ દરમિયાન બદમાશોએ હવામાં અનેક રાઉન્ડ ફાયરિંગ પણ કર્યું હતું. પોલીસે ગુનેગારોની શોધખોળ શરૂ કરી છે.


સૂત્રો મુજબ લૉરેન્સ બિશ્નોઈ ગેંગ સાથે જોડાયેલા સંપત નેહરાએ અગાઉ સુખદેવ સિંહને ધમકી આપી હતી. ધમકી મળ્યા બાદ સુખદેવ સિંહે જયપુર પોલીસને લેખિત ફરિયાદ પણ કરી હતી.