કોલકાતા રેપ-મર્ડર કેસ બાદ તપાસ હેઠળ આવેલા આરજી કર હોસ્પિટલના પૂર્વ પ્રિન્સિપાલ સંદીપ ઘોષની મુશ્કેલીઓમાં વધુ વધારો થયો છે. ઈન્ડિયન મેડિકલ એસોસિએશને તેમની વિરુદ્ધ કાર્યવાહી કરવાનો અને તેમની સભ્યપદ સસ્પેન્ડ કરવાનો નિર્ણય લીધો છે. IMAની શિસ્ત સમિતિએ સર્વસંમતિથી સંદીપ ઘોષનું સભ્યપદ સસ્પેન્ડ કરવાનો નિર્ણય લીધો છે.

ઈન્ડિયન મેડિકલ એસોસિએશને આરજી કર હોસ્પિટલના પૂર્વ પ્રિન્સિપાલ સંદીપ ઘોષનું સભ્યપદ સસ્પેન્ડ કર્યું છે. સમાચાર એજન્સી ANI દ્વારા આપવામાં આવેલી માહિતી પ્રમાણે IMA હેડક્વાર્ટરના રાષ્ટ્રીય અધ્યક્ષ ડૉ. આરવી અશોકન દ્વારા રચવામાં આવેલી અનુશાસન સમિતિએ સર્વસંમતિથી IMA કલકત્તા શાખાના ઉપાધ્યક્ષ ડૉ. સંદીપ ઘોષનું સભ્યપદ સસ્પેન્ડ કરવાનો નિર્ણય લીધો છે.

સીબીઆઈ કરી રહી છે તપાસ

નોંધનીય છે કે કોલકાતાની આરજી કર મેડિકલ કોલેજ અને હોસ્પિટલમાં મહિલા ડૉક્ટરની રેપ-હત્યાના કેસ બાદ તેના પૂર્વ પ્રિન્સિપાલ સંદીપ ઘોષ પણ તપાસના ઘેરામાં આવ્યા હતા. ઘટનાના બીજા જ દિવસે સંદીપ ઘોષે કોલેજના આચાર્ય પદેથી રાજીનામું આપી દીધું હતું. સંદીપ ઘોષના કાર્યકાળ દરમિયાન કૉલેજમાં નાણાકીય અનિયમિતતા અને ભ્રષ્ટાચારના કથિત આરોપો લાગ્યા હતા, ત્યારપછી કલકત્તા હાઈકોર્ટના નિર્દેશ પર CBIએ ઘોષ વિરુદ્ધ FIR નોંધીને તપાસ શરૂ કરી હતી.

સીબીઆઈ કરી રહી છે ફોન કોલ્સ ટ્રેક 

સીબીઆઈએ સંદીપ ઘોષનો પોલીગ્રાફ ટેસ્ટ પણ કરાવ્યો હતો. સમાચાર એજન્સી આઈએએનએસના અહેવાલ મુજબ 9 ઓગસ્ટની સવારે સેમિનાર રૂમમાંથી તાલીમાર્થી ડૉક્ટરનો મૃતદેહ મળી આવ્યા બાદ સીબીઆઈ હવે ઘોષ દ્વારા કરવામાં આવેલા મોબાઈલ ફોન કોલ્સ પર નજર રાખી રહી છે. તપાસ અધિકારીઓ એ જાણવાનો પ્રયાસ કરી રહ્યા છે કે તે કોલ્સ દરમિયાન વાતચીત દરમિયાન ખરેખર શું થયું.